BEYNƏLXALQ STANDARTLARA UYĞUN LABORATORİYA AVADANLIQLARININ ALINMASI PLANLAŞDIRILIR
Bakı, 10 yanvar (AZƏRTAC). Azərbaycan Hökuməti İkinci Kənd Təsərrüfatının İnkişafı və Kreditləşməsi Layihəsinin (KTİKL-2) həyata keçirilməsi məqsədilə Beynəlxalq İnkişaf Assosiasiyasından aldığı kreditin bir hissəsini laboratoriya avadanlıqlarının alınmasına sərf etməyi planlaşdırır.
Bununla əlaqədar Kənd Təsərrüfatı Nazirliyi yanında Kənd Təsərrüfatı Kreditləri üzrə Dövlət Agentliyi tender elan etmişdir.
Müsabiqə Dünya Bankının təlimatlarına əsasən beynəlxalq tender prosedurlarına uyğun, bütün iddiaçılar üçün açıq keçirilir.
Tenderdə iştirakla bağlı tələb olunan ixtisas göstəricilərinə əsasən iddiaçılar son 3 il ərzində oxşar malların təchiz edilməsi üzrə ən azı iki müqaviləni müvəffəqiyyətlə yerinə yetirmiş, laboratoriya avadanlıqlarının istehsalı və təchizatı üzrə ən azı 5 illik təcrübəyə malik olmalıdırlar. Bundan əlavə, müsabiqədə iştirak etmək istəyənlər son 3 ildə 3 milyon ABŞ dolları məbləğində analoji fəaliyyətlər həyata keçirmələri barədə məlumatları sübut edən və avadanlığın beynəlxalq standartlara uyğun olması barədə sənədlər təqdim etməlidirlər.
Tender təklifləri 20 min ABŞ dolları məbləğində tender təkliflərinin zəmanəti ilə müşayiət olunmalıdır.
Təkliflər bu ilin fevralın 16-dək qəbul ediləcəkdir.
Maraqlananlar (+99412) 4971301 və ya (+99450) 348 79 39 nömrələrinə zəng vurmaqla əlavə məlumat əldə edə bilərlər.
Bölmənin digər xəbərləri
