Beynəlxalq Valyuta Fondu Misirə 1,64 milyard dollarlıq maliyyə dəstəyi göstərəcək
Qahirə, 1 iyul, AZƏRTAC
Beynəlxalq Valyuta Fondu (IMF) Misirə 1,64 milyard dollar məbləğində yeni maliyyə dəstəyi göstərməyə ilkin razılıq verib. Bu addım Yaxın Şərqdəki müharibə zamanı Misirin üzləşdiyi iqtisadi problemlərin həllinə dəstək məqsədi daşıyır.
AZƏRTAC “əş-Şarq əl-Avsət” nəşrinə istinadla xəbər verir ki, ekspertlər IMF-in bu qərarını Misirdə islahatların gedişinə “beynəlxalq etibar” kimi dəyərləndirirlər.
Xatırladaq ki, 2022-ci ilin dekabrında Misirlə IMF arasında 3 milyard dollar kredit ayrılması barədə razılıq əldə edilib. 2024-cü ilin mart ayında bu məbləğin 8 milyarda çatdırılması barədə qərar qəbul edilib.
Beynəlxalq Valyuta Fondunun açıqlamasına görə, Genişləndirilmiş Maliyyələşdirmə Proqramı, eləcə də Dayanıqlılıq və Davamlılıq mexanizmi üzrə ekspertlər səviyyəsində əldə edilmiş razılaşmanın IMF İcraiyyə Şurası tərəfindən təsdiqindən sonra Misirə təxminən 1,64 milyard ABŞ dolları məbləğində vəsait ayrılacaq.
Bölmənin digər xəbərləri
