Biləsuvarlı könüllü: “Vikipediya”da böyük həvəslə məqalələr yaradırıq
Bakı, 12 iyul, AZƏRTAC
Biləsuvarlı könüllülər “Qorqud” Vikipediya Metodik Klubunun təlimlərində fəal iştirak edirlər. Onlar yeni məqalələrin yaradılması istiqamətində uğurlu fəaliyyət göstərirlər. Belə ki, son ayda biləsuvarlı könüllü gənclər tərəfindən şəhidlərimiz, həmçinin elm, təhsil, mədəniyyət və siyasət sahəsində fəaliyyət göstərmiş şəxslər haqqında onlarla məqalə yaradılıb və redaktə edilib.
Bu barədə AZƏRTAC-a Biləsuvarın “Viki” qrupunun fəal üzvü Ruqiyə Orucova məlumat verib. O bildirib ki, qrupun əsas fəaliyyət istiqaməti Azərbaycanın görkəmli şəxsiyyətləri, elm və mədəniyyət xadimləri, eyni zamanda, ölkəmizin ərazi bütövlüyünün qorunması uğrunda şücaət göstərmiş insanlar haqqında məqalələr yaratmaq və bu məlumatları onlayn ensiklopediyada yerləşdirməkdir. İndiyədək könüllülər tərəfindən 250-dən çox məqalə yaradılıb və redaktə edilib.
Xatırladaq ki, Biləsuvar rayonunda “Viki” könüllülər qrupu Milli Məclisin deputatı Bəhruz Məhərrəmovun təşəbbüsü ilə yaradılıb. “Qorqud” Vikipediya Metodik Klubu isə Milli Məclisin deputatı Elnur Allahverdiyevin təşəbbüsü ilə yaradılıb. Hazırda iki könüllü qrup arasında əməkdaşlıq davam edir.
Bölmənin digər xəbərləri
