“Bitki aləminin öyrənilməsində müasir yanaşmalar” - beynəlxalq konfrans
Bakı, 22 iyun, AZƏRTAC
İyunun 22-də Elm və Təhsil Nazirliyinin Botanika İnstitutunda Ümummilli Lider Heydər Əliyevin 100 illik yubileyinə həsr edilmiş “Bitki aləminin öyrənilməsində müasir yanaşmalar” mövzusunda beynəlxalq elmi-praktik konfrans işə başlayıb.
Bu barədə AZƏRTAC-a AMEA-dan məlumat verilib. Bildirilib ki, əvvəlcə institutun foyesində müəssisə alimlərinin elmi nailiyyətlərini əks etdirən sərgiyə baxış keçirilib.
Beynəlxalq konfrans Azərbaycan Respublikasının Dövlət Himninin səsləndirilməsi ilə başlayıb. Tədbirdə çıxış edən Botanika İnstitutunun baş direktoru professor Səyyarə İbadullayeva Ulu Öndər Heydər Əliyevin respublikamızda elmi potensialın intensiv inkişaf etdirilməsi və yüksəkixtisaslı elmi kadrların yetişdirilməsi istiqamətində əvəzsiz xidmətlərindən danışıb. Professor qeyd edib ki, Heydər Əliyevin uzaqgörənliyi sayəsində hazırda respublikamızda elmin, o cümlədən biologiyanın biokimya, biofizika, gen biotexnologiyası, bioinformatika, bioenergetika kimi müasir sahələri inkişaf edib. Onun sözlərinə görə, bu gün bioloq-alimlərimizin bitkilərin botaniki, texnoloji, tibbi cəhətdən fiziki-kimyəvi, hüceyrə, gen səviyyəsində hərtərəfli tədqiqi istiqamətinə yönəlmiş elmi-tədqiqat işləri beynəlxalq miqyasda tanınır və qiymətləndirilir. Alim bildirib ki, Ulu Öndər Azərbaycanın sabit inkişafının ekoloji problemlərin həllindən asılı olduğunu deyərək respublikada yeni ekoloji düşüncənin formalaşmasına zəmin yaradıb, nəticədə bioloji müxtəlifliyə yeni baxış və düzgün münasibət meydana çıxıb. İnstitutun baş direktoru bu siyasətin hazırda Ümummilli Liderin layiqli davamçısı Prezident İlham Əliyev tərəfindən uğurla davam etdirildiyini vurğulayıb. O, Müzəffər Ali Baş Komandanın rəhbərliyi ilə Qarabağın mənfur düşməndən azad edilməsi ilə bioloqlarımızın respublika ilə yanaşı, həm də Qarabağın bioloji müxtəlifliyinin tədqiqi istiqamətində geniş həcmli tədqiqatlar aparması üçün imkanların yarandığını vurğulayıb.
“Bu gün alimlərimizin qarşısında duran əsas vəzifə onlara göstərilmiş etimadı doğruldaraq ölkə Prezidentinin ətrafında sıx birləşmək, Azərbaycan dövlətçiliyinin qorunması, onun müstəqilliyinin möhkəmləndirilməsi, iqtisadi dirçəlişi naminə fundamental və tətbiqi tədqiqatların intensivliyinin yüksəldilməsinə çalışmaqdan ibarətdir”, - deyə Səyyarə İbadullayeva çıxışının sonunda bildirib.
AMEA-nın vitse-prezidenti akademik İradə Hüseynova Botanika İnstitutunun ölkəmizdə bitkilər aləmini öyrənən geniş profilli elmi mərkəz olduğunu diqqətə çatdırıb. İ.Hüseynova böyük alim və ictimai-siyasi xadim, Azərbaycanda biologiya elminin müasir istiqamətlərinin, eləcə də bu sahədə elmi məktəbin yaradılmasında misilsiz xidmətləri olan akademik Cəlal Əliyevin elmi fəaliyyətinin böyük bir qisminin məhz bu institutla bağlı olduğunu deyib. O, Botanika İnstitutunda bitki fiziologiyası, biokimyası, biofizikası, molekulyar biologiya və bioinformatika üzrə əldə edilmiş nailiyyətlərin akademik Cəlal Əliyevin fəaliyyəti ilə sıx bağlı olduğunu vurğulayıb. Həmçinin Botanika İnstitutunun inkişafında respublikamızda floristik və geobotaniki tədqiqatların əsasını qoymuş akademik A.Qrossheymin böyük xidmətləri olduğunu qeyd edib.
Vitse-prezident Azərbaycan xalqının Ümummilli Lideri, görkəmli dövlət xadimi Heydər Əliyevin 100 illik yubileyinin ölkəmizdə və onun hüdudlarından kənarda geniş miqyasda qeyd edildiyini vurğulayıb. İradə Hüseynova Ulu Öndərin hakimiyyətdə olduğu bütün illərində elmə, elm adamlarına xüsusi diqqət və qayğı göstərdiyini, xalqımızın inkişafının elmdə, intellektual potensialının zənginləşməsində gördüyünü söyləyib. O, Ümummilli Liderin təməlini qoyduğu bu siyasətin Prezident İlham Əliyev tərəfindən uğurla davam etdirildiyini, elmin hüquqi bazasının möhkəmləndirildiyini, “Elm haqqında” Azərbaycan Respublikası Qanununun qəbul olunduğunu deyib.
Akademik Azərbaycanın “Qırmızı kitab”ının üçüncü nəşrinin alimlərimizin “Heydər Əliyev İli”nə dəyərli töhfəsi olduğunu söyləyərək, nəşrin ərsəyə gəlməsində Botanika İnstitutunun alimlərinin yaxından iştirak etdiyini bildirib.
Tədbirdə Yeni Azərbaycan Partiyası Qadınlar Şurasının İdarə Heyətinin üzvü Zərifə Quliyeva, Milli Məclisin deputatı, professor Kamilə Əliyeva, Elm və Təhsil Nazirliyinin nümayəndəsi Samir Həmidov, Ekologiya və Təbii Sərvətlər Nazirliyi yanında Bioloji Müxtəlifliyin Qorunması Xidmətinin rəis müavini Arzu Babayeva, akademik Tariyel Talıbov, AMEA-nın müxbir üzvləri Pənah Muradov, Vaqif Novruz, Botanika İnstitutun Mikologiya şöbəsinin müdiri dosent Dilzarə Ağayeva və başqaları çıxış edərək Ulu Öndərin Azərbaycan xalqı və dövləti qarşısında müstəsna tarixi xidmətlərindən, biologiya elminin inkişaf etdirilməsi, bitki aləminin qorunması, eləcə də respublikamızın ziyalıları və elm adamları qarşısında geniş imkanların açılması istiqamətində gördüyü əhəmiyyətli işlərdən bəhs ediblər.
Konfransda Ukrayna Milli Elmlər Akademiyasının M.G.Xolodnı adına Botanika İnstitutunun Mikologiya şöbəsinin baş elmi işçisi professor Nina Bisko, Özbəkistanın Karantin və Bitkilərin Mühafizəsi Agentliyinin Mərkəzi fitosanitar laboratoriyasının müdiri Sevarxon Xodcayeva, Fitosanitariya standartları üzrə GIZ layihəsinin əsas eksperti Tatyana Masten Milek də çıxış edərək beynəlxalq tədbirin işinə uğurlar arzulayıb, təşkilatçılara və institutun rəhbərliyinə minnətdarlıqlarını bildiriblər.
Daha sonra konfrans öz işini bölmə iclasları ilə davam etdirib.
Beynəlxalq tədbir öz işinə iyunun 24-də yekun vuracaq.
Bölmənin digər xəbərləri
