BMT EKSPERTLƏRİ AZƏRBAYCAN İQTİSADİYYATININ İNKİŞAF SÜRƏTİNİ YÜKSƏK QİYMƏTLƏNDİRİRLƏR
Hesabatda 2006-ci ildə MDB məkanında (Baltikyanı ölkələr istisna olmaqla) ümumi iqtisadi artım sürətinin 2005-ci ilə nisbətən 0,3 faiz artaraq, 6,3 faiz təşkil edəcəyi bildirilir. BMT ekspertlərinin fikrincə, builki iqtisadi inkişaf tendensiyasının aktivləşməsinə bölgə dövlətlərində daxili tələbatın artması, iqtisadiyyatın restrukturizasiyası, neft ixracının artımı və s. amillər müsbət təsir göstərəcəkdir. Belə ki, Azərbaycan və Qazaxıstanın neft-qaz bölməsinin inkişafı sərmayə qoyuluşunu və istehsalı stimullaşdıracaqdır. Eyni zamanda, Ukraynada iqtisadi artım sürətinin azalmasına son qoyulacaqdır.
Ayrı-ayrı dövlətlərdə 2006-ci ildə iqtisadi artımın səviyyəsinə gəldikdə isə, BMT ekspertləri bu göstəricinin Azərbaycanda 15 faiz, Qazaxıstanda 8,3 faiz, Ermənistan və Tacikistanda 8 faiz, Özbəkistanda 7 faiz, Moldovada 6,5 faiz, Ukrayna və Gürcüstanda 6 faiz, Rusiyada 5,8 faiz, Qırğızıstan və Türkmənistanda isə 5 faiz olacağını ehtimal edirlər.
Xatırladaq ki, cari ilin yanvar-aprel aylarında Azərbaycanda ümumi daxili məhsulun artım sürəti 39,5 faiz təşkil etmişdir. 2006-cı il üçün bu göstəricinin 30 faizdən çox olacağı nəzərdə tutulmuşdur.
Bölmənin digər xəbərləri
