BMT-nin Azərbaycandakı rezident-əlaqələndiricisi: Bakı iqlim öhdəliklərini real fəaliyyətə yaxınlaşdırır
Bakı, 9 sentyabr, AZƏRTAC
Bakı İqlim Fəaliyyəti Həftəsi (BCAW 2026) qlobal iqlim öhdəliklərinin konkret fəaliyyətə çevrilməsi baxımından mühüm platformadır.
Bu fikirləri AZƏRTAC-a açıqlamasında BMT-nin Azərbaycandakı rezident-əlaqələndiricisi Dmitro Şlapaçenko deyib.
O bildirib ki, bir çox hökumət müxtəlif bəyanatlar verir, lakin bu bəyanatlar hər zaman konkret addımlara çevrilmir. Onun sözlərinə görə, Azərbaycan hökuməti Bakı İqlim Fəaliyyəti Həftəsinin keçirilməsi ilə iqlim məsələlərinə real və ciddi yanaşdığını nümayiş etdirib.
“Bakı İqlim Fəaliyyəti Həftəsinin keçirilməsi böyük hazırlıq və ciddi öhdəlik tələb edir. Azərbaycan hökuməti bir daha nəticə əldə edə bildiyini nümayiş etdirdi”, – deyə BMT rəsmisi vurğulayıb.
Qeyd edib ki, tədbir çərçivəsində siyasətçilər, fəallar, biznes nümayəndələri, beynəlxalq təşkilatlar, hökumət rəsmiləri, eləcə də iqlim məsələlərinə daha skeptik yanaşan tərəflər bir araya gəliblər.
“Bu çox dəyərlidir. Çünki Bakıda yaradılan atmosfer insanların konkret fəaliyyətlər haqqında danışmasına imkan verir. Konfransın iki günü ərzində dəfələrlə bəyan edilən öhdəliklərin konkretləşdirilməsinin vacibliyinin vurğulandığını eşitdik. Bəzi iştirakçılar artıq konkret öhdəliklərlə çıxış edirlər”, – deyə Dmitro Şlapaçenko bildirib.
BMT-nin Azərbaycandakı rezident-əlaqələndiricisi ifadə olunan öhdəliklərin real fəaliyyətə çevriləcəyinə ümid etdiyini qeyd edib.
“Düşünürəm ki, Bakı olmasaydı, burada yaranmış bu qədər güclü dinamika və impuls olmazdı. Buna görə mənim qiymətləndirməm olduqca müsbətdir. Digər hökumətlər də eyni yanaşmanı nümayiş etdirsələr, daha yaxşı nəticələr əldə edə bilərik”, – deyə o əlavə edib.
Bölmənin digər xəbərləri
