BMT: Səmərəli qlobal tərəfdaşlıq növbəti pandemiyanın qarşısını ala bilər
Bakı, 22 iyul, AZƏRTAC
Üzv dövlətlər, vətəndaş cəmiyyəti və elmi icma arasında səmərəli tərəfdaşlıq növbəti pandemiyanın qarşısını ala bilər. AZƏRTAC xəbər verir ki, bu BMT-nin İqtisadi və Sosial Şurasının (ECOSOC) Nyu-Yorkda keçirilən son iclasında ifadə olunub.
İclasda məruzə ilə çıxış edən London Universitet Kollecinin yoluxucu xəstəliklər üzrə professoru, doktor İbrahim Əbubəkr əsas məsələ yeni pandemiyanın nə vaxt baş verəcəyi deyil, qlobal səhiyyə sisteminin ona ciddi hazırlıq görməsidir. “Bu, problemdir, çünki mahiyyət etibarı ilə pandemiyanın qarşısını bir ölkə təkbaşına ala bilməz. Yoluxucu xəstəliklər sərhəd tanımır və buna görə də, bərabərlik, ləyaqət və universal çıxışı təmin etmək üçün səhiyyə sistemləri də sərhədləri aşan siyasətləri həyata keçirmək üçün çevik olmalıdır”, -deyə o vurğulayıb.
Professorun sözlərinə görə, hazırda pandemiyaya hazırlığı ehtiva edən mövcud səhiyyə sistemi fövqəladə hallar meydana çıxdıqdan sonra yetərincə çevik deyil. Lakin bir çox ölkədə hazırlıq pandemiyadan kənarda reabilitasiya xidmətləri və ilkin tibbi yardım kimi məsələlərə şamil edilir, onların hər ikisi təkcə insanların rifahına deyil, həm də sülh və təhlükəsizliyə kritik sərmayələrdir.
BMT İnkişaf Proqramının (UNDP) səhiyyə üzrə direktoru Mandep Dhalivalın sözlərinə görə, hazırda istehsal olunan pandemiya əleyhinə profilaktik dərmanlar reaktiv tibdən daha ucuzdur. O əlavə edib: “Müalicə olduğu qədər profilaktikaya da investisiya yatırmaq vacibdir və bu, daha qənaətlidir, çünki virusun geniş yayılmasının qarşısı alınır. Bununla belə, investorları profilaktik qayğıya dəstək verməyə inandırmaq çətin ola bilər, çünki onun nəzərəçarpacaq nəticələri dərhal görünmür”.
Dayanıqlı İnkişaf üzrə Yüksək Səviyyəli Siyasi Forum (HLPF) BMT-nin Nyu-Yorkdakı Baş Qərargahında qlobal miqyasda razılaşdırılmış 17 Dayanıqlı İnkişaf Məqsədi (SDG) istiqamətində irəliləyişi (və ya bunun olmaması) müzakirə etmək üçün toplanır. İlk 16 məqsəd yoxsulluq, gender bərabərliyi və iqlim dəyişikliyi kimi inkişafın spesifik aspektləri ilə məşğul olur, lakin 17-si digərlərinə nail olmaq üçün bir yol qoyur. Bu yol dövlət hökumətləri, vətəndaş cəmiyyəti təşkilatları, icmalar və özəl sektor arasında qlobal tərəfdaşlığı əhatə edir.
BMT qeyd edir ki, SDG üçün 4 trilyon dollar vəsaitin təmin edilməsi problemə çevrilib və bu səbəbdən böyük layihələrin, o cümlədən pandemiya ilə mübarizə proqramlarının həyata keçirilməsi müşkülə çevrilib.
BMT-nin Cənub-Cənub Əməkdaşlıq Ofisinin (UNOSSC) direktoru Dima Əl-Xatib HLPF tədbirində deyib: “Biz ənənəvi stereotipləri aradan qaldıran həqiqi transformativ tərəfdaşlıqlar qurmalıyıq: hökumətlər, vətəndaş cəmiyyəti, özəl sektor və çoxtərəfli institutların hamısının davamlı inkişaf üçün inklüziv koalisiyada oynamalı olduğu rollar var”.
Bölmənin digər xəbərləri
