BMT Şərqi və Mərkəzi Avropanın irimiqyaslı daşqınlarla üzləşəcəyi barədə xəbərdarlıq edir
Bakı, 22 fevral (AZƏRTAC). BMT bu mövsüm bütün Avropa regionuna bol yağmış qarın və buzların əriməsinin səbəb ola biləcəyi daşqınlar barədə Şərqi və Mərkəzi Avropa ölkələrinə xəbərdarlıq etmişdir. Daşqın riskinə daha çox Dunay çayı ətrafındakı rayonlar məruz qalacaqdır. Həmin bölgələrdə yazın müjdəçisi olan mülayimləşmənin ilk əlamətləri artıq görünməyə başlamışdır.
Fəlakət Təhlükəsinin Azaldılması üzrə Beynəlxalq Strategiyanın Katibliyinin mətbuat katibi Denis Makklin xəbərdarlıq etmişdir ki, son 10 ildə ən irimiqyaslı daşqınlar gözlənilir. O demişdir: “Yüzlərlə insanın həlak olduğu sərt qış mövsümündə ən pis ssenarilərə hazırlıq işində bir sıra qüsurlar üzə çıxarılmışdır. Bütün Avropa boyu bir çox zəif icmalar nəqliyyat, məktəb, tibb müəssisələri və elektrik enerjisindən təcrid olunmuşdur”.
Makklin əlavə etmişdir ki, hazırda Dunay çayı boyu bölgələrdə mülayimləşmə başlayır. Eyni zamanda Serbiyadan tutmuş Bolqarıstanadək ucsuz-bucaqsız ərazi hələ qarın altındadır. Dağıdıcı daşqınlar, xüsusən, torpaq bəndləri və suaxıdan sistemlər olmayan bölgələrdə insan tələfatına və iqtisadi itkilərə gətirib çıxara bilər.
BMT Baş katibinin fəlakət təhlükəsinin azaldılması üzrə xüsusi nümayəndəsi Marqareta Valstrem bütün region dövlətlərini ciddi şəkildə qarşıdan gələn təbii fəlakətə hazırlaşmağa çağırmışdır. Bununla əlaqədar olaraq, o, 500-dən çox suaxıdan sistemin və bəndin, habelə bəzi su anbarlarının vəziyyətini yoxlamış Bolqarıstanı örnək gətirmişdir.
2002-ci ildə Elba və Dunay çaylarının məcrasından çıxması nəticəsində Avropanın bir çox ölkələrini su basdıqdan sonra daşqınlara dair Avropa Xəbərdarlıq Sistemi işə salınmışdır.
Bölmənin digər xəbərləri
