BMU-BUCEA ikili diplom proqramının magistrantı tədqiqatını Çində təqdim edib
Bakı, 19 oktyabr, AZƏRTAC
Bakı Mühəndislik Universiteti (BMU) ilə Pekin İnşaat Mühəndisliyi və Memarlıq Universiteti (BUCEA) arasında həyata keçirilən ikili diplom proqramının magistrantı Sənur Məmmədli Çində beynəlxalq elmi konfransda məruzə ilə çıxış edib.
Bu barədə AZƏRTAC-a BMU-dan məlumat verilib. Bildirilib ki, Pekin Xarici Dillər Universitetinin təşkilatçılığı ilə Pekində “Qarşılıqlı öyrənmə, dostluq, qarşılıqlı fayda: Çin-Azərbaycan hərtərəfli strateji tərəfdaşlığının yeni mərhələsi” mövzusunda II Çin azərbaycanşünaslıq beynəlxalq elmi konfransı keçirilib. Tədbirdə Azərbaycan və Çindən 40-dan çox alim iştirak edib.
Çin-Azərbaycan münasibətlərinin inkişafı, qarşılıqlı öyrənmə və elmi əməkdaşlıq məsələlərinə həsr olunan konfransda Sənur Məmmədli azərbaycanşünaslığı Azərbaycan dili, tarixi və mədəniyyəti ilə yanaşı, ölkənin digər regionlar və sivilizasiyalarla tarixi və müasir əlaqələrini araşdıran fənlərarası elm sahəsi kimi səciyyələndirib. O, həmçinin incəsənət və mədəni irs sahələrində süni intellekt və kompüter görməsi texnologiyalarının tətbiqinə dair tədqiqatlarının nəticələrini bölüşüb. Həmin tədqiqatların nəticələrinin “English Writing for Science and Technology” adlı beynəlxalq dərsliyə daxil edilməsi nəzərdə tutulur.
Konfransda BUCEA-nın Xarici dillər kafedrasının müəllimi, doktor Zhu Shu da Azərbaycanın elm və təhsilinə həsr olunmuş məruzə ilə çıxış edib. Məruzədə ikili diplom proqramı çərçivəsində aparılan elmi araşdırmalara toxunulub, Sənur Məmmədlinin tədqiqat fəaliyyəti diqqətə çatdırılıb. Eyni zamanda, BMU-nun yüksəkixtisaslı kadrların hazırlanmasındakı rolu vurğulanıb.
Konfransda hər iki ölkənin alim və tədqiqatçılarının 30-a yaxın məruzəsi dinlənilib. Azərbaycanşünaslıq elminin inkişafı, iki ölkə arasında təhsil, mədəniyyət və tarixi əlaqələrin genişləndirilməsi, eləcə də “Bir kəmər, bir yol” təşəbbüsü, Orta Dəhliz və regional əməkdaşlıq perspektivləri ətrafında fikir mübadiləsi aparılıb.
BMU-BUCEA ikili diplom proqramı çərçivəsində əldə olunan elmi nəticələrin beynəlxalq konfransda təqdim edilməsi universitetlər arasında akademik əməkdaşlığın inkişafını və proqramın tədqiqat fəaliyyəti üçün yaratdığı imkanları nümayiş etdirir.
Bölmənin digər xəbərləri
