BMU ilə “Turan Volts Energy” arasında memorandum imzalanıb
Bakı, 9 dekabr, AZƏRTAC
Bakı Mühəndislik Universiteti (BMU) və Birləşmiş Ərəb Əmirliklərinin “Volts Energy” şirkətinin Azərbaycandakı törəməsi olan “Turan Volts Energy” arasında əməkdaşlıq haqqında anlaşma memorandumu imzalanıb.
Bu barədə AZƏRTAC-a BMU-dan bildirilib. İmzalanma mərasimində BMU-nun rəhbər heyəti, Birləşmiş Ərəb Əmirliklərinin “Masdar” şirkətinin ölkə üzrə meneceri, “Masdar Azərbaycan” MMC-nin direktoru Murad Sadıxov, “Volts Energy”nin (BƏƏ) ölkə meneceri və “Turan Volts Energy”nin direktoru Nadir Bədəlov iştirak ediblər.
BMU rektoru Yaqub Piriyev və “Turan Volts Energy”nin direktoru Nadir Bədəlov tərəfindən imzalanan sənəd peşəkar kadr hazırlığı və inkişafı, insan kapitalı, eləcə də bərpaolunan enerji innovasiyasında geniş əməkdaşlığın qurulmasını nəzərdə tutur. Razılaşmaya əsasən, universitet kampusunda Günəş elektrik stansiyasının yaradılması layihəsinə “Turan Volts Energy” tərəfindən dəstək veriləcək və bu stansiya müvafiq ixtisaslar üzrə təhsil alan tələbələr üçün həm tədris, həm də tədqiqat obyekti kimi istifadə olunacaq. Bundan başqa, şirkətin yüksəkvəzifəli menecerləri və dəvət edilmiş xarici ekspertləri tərəfindən tələbələr üçün müxtəlif mövzularda mühazirələr təşkil olunacaq, onların istehsalat təcrübəsi keçməsi təmin ediləcək. Eyni zamanda, BMU məzunları şirkət və onun tərəfdaş müəssisələrində iş imkanları ilə təmin ediləcək, tələbələr üçün müvafiq sahə müəssisələrinə ekskursiyalar təşkil olunacaq.
Rektor Yaqub Piriyev memorandumun universitet-sənaye əməkdaşlığının gücləndirilməsi, eləcə də bərpaolunan enerji sahəsində müasir bilik və təcrübələrin tələbələrə çatdırılması baxımından mühüm əhəmiyyət daşıdığını bildirib. Rektor qeyd edib ki, Prezident İlham Əliyevin rəhbərliyi altında bərpaolunan enerji milli inkişaf prioritetinə çevrilib və universitetlər bu strategiyada mühüm rol oynayır. Yaqub Piriyev, eyni zamanda, “Volts Energy” və “Turan Volts Energy”yə təşəkkürünü bildirərək bu tərəfdaşlığın BMU-nun “yaşıl kampus” konsepsiyasının inkişafına mühüm dəstək olacağına inandığını deyib.
Tədbirdə digər məruzəçilər “Masdar” və “Volts Energy” şirkətlərinin Azərbaycandakı fəaliyyətini vurğulayıb, təmiz enerji sahəsində təhsil, təlim, tətbiqi tədqiqatlar üzrə birgə imkanlar müzakirə edilib.
“Volts Energy” Əbu-Dabidə yerləşən və Masdar City ilə bp-nin birgə yaratdığı “Catalyst” startap texnologiya akseleratoru çərçivəsində fəaliyyət göstərir. Bu akselerator dünyanı daha dayanıqlı hala gətirmək məqsədilə texnologiyadan istifadə edən, dayanıqlılığa fokuslanan, başlanğıc mərhələsində olan layihələri dəstəkləyir. BMU-“Turan Volts Energy” əməkdaşlığı təmiz və bərpaolunan enerjinin təşviqi istiqamətində praktik addımı təmsil edir və BMT-nin Davamlı İnkişaf Məqsədləri ilə uzlaşır. Bu əməkdaşlıq akademik bilikləri sənaye tələbləri ilə birləşdirəcək və Azərbaycanda innovasiya ekosistemini gücləndirəcək.
Sonda qonaqlar BMU-nun laboratoriyaları ilə tanış olub və Günəş elektrik stansiyasının yaradılacağı əraziyə baxış keçiriblər.
Bölmənin digər xəbərləri
