Şamaxı, 18 mart, AZƏRTAC

Şamaxı şəhərinin mərkəzində, Heydər Əliyev parkında Novruzun gəlişi ilə əlaqədar rayon şənliyi keçirilib.

AZƏRTAC xəbər verir ki, səhər saatlarında Göylər kənd folklor evinin “Qala” folklor ansamblı, kosa və keçəl Şamaxının küçələrini gəzərək sakinləri şənliyə çağırıblar. Şənliyə toplaşan izdihamın sürəkli alqışları altında Novruz tonqalı alovlandırılıb. Rayon icra hakimiyyətinin başçısı Asif Ağayev sakinləri və qonaqları təbrik edib, Novruzun milli bayram kimi qeyd edilməsini dövlət müstəqilliymizin xalqımıza verdiyi böyük töhfə kimi dəyərləndirib. Qeyd olunub ki, Azərbaycanın birinci xanımı, Heydər Əliyev Fondunun prezidenti Mehriban Əliyevanın təşəbbüsü ilə Novruz UNESCO-nun qeyri-maddi mədəni irs siyahısına daxil edilib. Birləşmiş Millətlər Təşkilatının Baş Məclisi isə martın 21-ni “Beynəlxalq Novruz Günü” elan edib.

Şənlikdə “Gülüstan” xalq çalğı alətləri, “Nağara çalanlar” ansambllarının, Şamaxı meyxanaçılarının, “İgidlər” rəqs qrupunun, “Şirvan” folklor ansamblının, aşıqların çıxışları, Kosa və Keçəlin şən zarafatları, Bahar qızın xoş müjdəli təbrikləri iştirakçılar tərəfindən sürəkli alqışlarla qarşılanıb.

Parkda Şamaxının uzaq keçmişini, bu gününü əks etdirən sərgilər, o cümlədən Dəmirçi kənd sənətkarlarının dəmirçilik sənət nümunələrinin sərgisi, yerli məhsulların təqdimatı böyük maraqla qarşılanıb.

Mərasim iştirakçıları Şamaxı mətbəxinin təamlarına həvəslə qonaq olublar.

X X X

Kürdəmir rayonunda Novruzun gəlişi ümumrayon şənliyi ilə qeyd olunub.

AZƏRTAC xəbər verir ki, bayramsayağı bəzədilən Heydər Əliyev parkında keçirilən şənlikdə rayon rəhbərləri, ictimaiyyətin nümayəndələri, Kürdəmirdə məskunlaşan qaçqın və məcburi köçkünlər iştirak ediblər.

Bahar qızının parka gəlişi ilə başlanan bayram şənliyində Novruz tonqalı alovlandırılıb. Çıxış edən rayon rəhbərləri xalqımızın əziz bayramı ilə əlaqədar sakinləri təbrik edib, onlara xoşbəxt həyat, bol ruzi, əmin-amanlıq arzulayıblar. Çıxışlarda Novruzun xalqımızın milli mənəvi dəyərlərini özündə əks etdirən qədim el bayramı olduğu vurğulanıb, müstəqillik qazanılandan sonra bu bayramı hər il dövlət səviyyəsində qeyd edildiyi razılıq hissi ilə xatırlanıb.

Sonra tədbir iştirakçıları milli musiqi sədalarının, Kosa və Keçəlin şən zarafatlarının, idmançıların, yumurta döyüşdürənlərin yaratdığı şən əhval-ruhiyyə ilə parkda təşkil edilən sərgilərə, qədim adət-ənənələrmizin nümayişinə həvəslə tamaşa ediblər.

Şənlik Heydər Əliyev parkındakı “Yaşıl teatr”da rayon incəsənət ustalarının maraqlı konsert proqramı ilə davam etdirilib.