Botanika İnstitutu ilə Kyu Kral Botanika Bağları arasında yeni memorandum imzalanıb
Bakı, 24 oktyabr, AZƏRTAC
Elm və Təhsil Nazirliyinin Botanika İnstitutu ilə Böyük Britaniyanın Kyu Kral Botanika Bağları arasında yeni anlaşma memorandumu imzalanıb.
Bu barədə AZƏRTAC-a institutdan məlumat verilib. Bildirilib ki, sənədi Kyu Kral Botanika Bağlarının elm üzrə direktoru professor Aleksandr Antonelli və Botanika İnstitutunun baş direktoru professor Səyyarə İbadullayeva imzalayıb. Anlaşma memorandumuna əsasən, yerinə yetirilən işlər və gələcək fəaliyyətlər, gənc alim və doktorantların Kyu Botanika Bağında təcrübə, təlim keçməsi və tədqiqatlar aparması, o cümlədən yeni qrant hesabına ölkəmizdə nadir və nəsli kəsilmək təhlükəsində olan növlərin itmə səbəblərinin öyrənilməsi əsas prioritetlərdəndir.
Səfər çərçivəsində təşkilatın nəzdində fəaliyyət göstərən Herbarium və Fungariumla tanışlıq və gələcək əməkdaşlıq imkanları barədə ilkin danışıqlar aparılıb. Həmçinin Kral Botanika Bağına səyahət zamanı onların təcrübəsinə aid bəzi detalların gələcəkdə ölkəmizdə həyata keçirilməsi vacib hesab edilib.
Xatırladaq ki, professor Səyyarə İbadullayeva və Botanika İnstitutunun Mikologiya şöbəsinin müdiri dosent Dilzarə Ağayeva Kyu Kral Botanika Bağlarının təşkilatçılığı ilə keçirilən “Dünya bitki və göbələklərinin vəziyyəti” adlı beynəlxalq simpoziumda iştirak etmək Böyük Britaniyanın London şəhərində ezamiyyətdə olublar.
Bölmənin digər xəbərləri
