ELM VƏ TƏHSİL
Botanika İnstitutunun əməkdaşı palinoloji tədqiqat aparıb
![Botanika İnstitutunun əməkdaşı palinoloji tədqiqat aparıb](/files/2023/3/1200x630/16983247243260728207_1200x630.jpg)
Bakı, 26 oktyabr, AZƏRTAC
Elm və Təhsil Nazirliyinin Botanika İnstitutunun Biomorfologiya və fitointroduksiya şöbəsinin elmi işçisi Şəbnəm İsayeva və Rusiya Elmlər Akademiyasının V.L.Komarov adına Botanika İnstitutunun Palinologiya laboratoriyasının müdiri Valentina Qriqoryevanın həmmüəllifi olduqları “Qızmeydan palçıq vulkanının bəzi bitkilərinin tozcuqlarının morfologiyası (Azərbaycan Respublikası)” adlı məqaləsi “Rusiya elmlər akademiyası” nəşriyyatının “Russian Science Citation İndex və Scopus” bazasına daxil olan “Botaniçeskiy jurnal”da dərc edilib.
Bu barədə AZƏRTAC-a institutdan məlumat verilib.
Elmi araşdırma Şamaxı rayonu ərazisində Qızmeydan palçıq vulkanının flora və bitki örtüyünün, həmçinin palçıq vulkanı zonasından kənarda müqayisəli tədqiqi, ərazinin əsas növlərinin palinomorfologiyası və morfologiyasından bəhs edir. Tədqiqatın məqsədlərindən biri əlverişsiz böyümə şəraitinin tozcuqların keyfiyyətinə təsirini qiymətləndirməkdir.
Ş.İsayeva palinoloji tədqiqatları əməkdaşlıq memorandumu çərçivəsində Rusiya Elmlər Akademiyasının V.L.Komarov adına Botanika İnstitutunda ezamiyyətdə olarkən bu müəssisənin Palinologiya laboratoriyasında aparıb.