Böyük Britaniyanın ən böyük nüvə obyekti risk yaradır
London, 4 iyun, AZƏRTAC
Böyük Britaniyanın Kümberlend bölgəsində yerləşən və ölkənin ən böyük nüvə obyekti olan “Sellafield”də radioaktiv suların yerə sızması 2050-ci illərə qədər davam edə bilər.
AZƏRTAC BBC-yə istinadla xəbər verir ki, bu barədə Böyük Britaniya Parlamentinin İctimai Hesabatlar Komitəsi yeni hesabatında xəbərdarlıq edib. Komitə obyektin utilizasiya işlərinin ləng getdiyini və layihənin ciddi maliyyə artımları ilə müşayiət olunduğunu diqqətə çatdırıb. Hesabatda “Sellafield”in hazırkı vəziyyətinin böyük risklər yaratdığı vurğulanıb.
Ən ciddi təhlükə isə nüvə kompleksinin daxilində yerləşən “Magnox Swarf Storage Silo” adlanan obyektlə bağlıdır. Nüvə Ləğv İdarəsi bu tikilini Böyük Britaniyanın ən təhlükəli binası adlandıraraq, burada 2018-ci ildən indiyədək radioaktiv suyun yerə sızdığını və bu suyun həcminin üç ildə bir olimpiya üzgüçülük hovuzunu dolduracaq qədər olduğunu təsdiqləyib. Sızmanın qarşısının yalnız binanın ən köhnə hissəsinin tam boşaldılmasından sonra, təxminən 2050-ci illərdə alınacağı gözlənilir. Bu tarix isə əvvəllər planlaşdırılandan təxminən on il gecdir.
Nüvə Ləğv İdarəsindən bildirilib ki, binadan sızma onların ən böyük ekoloji problemi olaraq qalır. Hazırda “Sellafield” obyektindəki təhlükəsizlik və utilizasiya işləri mürəkkəb bir proses kimi qiymətləndirilir.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
