Braziliya Prezidenti: Ukrayna müharibəsində hərbi qələbə mümkün deyil
Bakı, 21 iyun, AZƏRTAC
Ukrayna müharibəsində hərbi qələbə mümkün deyil və tərəflər tez bir zamanda sülhə nail olmalıdır.
AZƏRTAC xəbər verir ki, Braziliya Prezidenti Luis İnasiu Lula da Silva bu fikri İtaliyanın “Corriere della Sera” qəzetinə müsahibəsində səsləndirib.
“Ukrayna və Rusiya hərbi planda qələbə qazanacaqlarını düşünürlər, mən bu fikirlə razı deyiləm. Çox az adam sülhdən danışır. Dünyada bu qədər insanın aclıqdan əziyyət çəkdiyi, bu qədər uşağın yemək tapmadığı bir vaxtda qeyr-bərabərlik probleminin həlli yollarını axtarmaq əvəzinə, müharibə ilə məşğuluq. Kiyevlə Moskvanın sülhün yolunu tapması çox vacibdir”, - deyə Braziliya lideri bildirib.
O, həmçinin beynəlxalq münasibətlərdən danışarkən BMT Təhlükəsizlik Şurasında islahatlar aparmaq ideyasını dəstəkləyib: “Bu mexanizm 1945-ci il tarazlığını əks etdirir. Lakin 80 illik fəaliyyətindən sonra sülhə və təhlükəsizliyə həqiqi xidmət etmək üçün Latın Amerikası və Afrikanın səslərinin təmsil olunduğu daha geniş Şuraya ehtiyac var”.
Qeyd edək ki, Braziliyanın dövlət başçısı Luis İnasiu Lula da Silva İtaliya Prezidenti Sercio Mattarella, Baş nazir Ciorcia Meloni və Roma Papası Fransisklə görüşmək üçün bu ölkədə səfərdədir.
Bölmənin digər xəbərləri
