Britaniyada işsizlik artmaqda davam edir
London, 12 iyun, AZƏRTAC
Böyük Britaniya şirkətləri əmək bazarında qeyri-müəyyənlik fonunda yeni işçilərin işə qəbulunu ləngidir və ya işdən ayrılanların yerini doldurmur.
AZƏRTAC BBC-yə istinadla xəbər verir ki, bu barədə Böyük Britaniya Milli Statistika İdarəsinin (ONS) açıqladığı son rəqəmlər göstərir. Məlumata görə, mart–may ayları arasında ölkə üzrə mövcud vakansiyaların sayı 63 min vahid azalaraq 736 minə düşüb. Bu, əmək bazarında zəifləmənin davam etdiyini göstərir.
ONS-un iqtisadi statistika direktoru Liz Makkion bildirib ki, işçi maaşları üzrə vergi hesabatlarında da azalma müşahidə olunur. Onun sözlərinə görə, bir çox şirkət ya işə qəbuldan çəkinir, ya da işdən çıxan əməkdaşların yerini doldurmur.
Qeyd edək ki, apreldə işəgötürənlər üçün milli sığorta ödənişləri artırılıb və minimum əməkhaqqı yüksəldilib. Ekspertlərə görə, bu dəyişikliklər şirkətlərin işçi saxlama xərclərini artırıb. Bu isə vakansiyalara birbaşa təsir edir. Statistika həmçinin işsizlik səviyyəsinin 4,6 faizə yüksəldiyini göstərir. Bu, son dörd ilin ən yüksək səviyyədir.
London
Bölmənin digər xəbərləri
