Britaniyada mobil telefonlara fövqəladə xəbərdarlıq siqnalı göndəriləcək
London, 5 sentyabr, AZƏRTAC
Böyük Britaniyada hökumət ölkə üzrə fövqəladə xəbərdarlıq sistemi ilə bağlı ikinci sınaq keçirəcək.
AZƏRTAC xəbər verir ki, sentyabrın 7-də, bazar günü saat 15:00-da mobil telefonlara xüsusi siqnal göndəriləcək.
Rəsmi məlumatlara görə, sınaq zamanı təxminən 87 milyon mobil cihaz səsli xəbərdarlıq alacaq. Telefonlar 10 saniyə ərzində titrəyəcək və yüksək səsli siqnal verəcək. Bu, hətta cihaz səs rejimində olduqda da baş verəcək. Telefon ekranında isə bunun yalnız sınaq olduğu və heç bir tədbir görülməsinə ehtiyac olmadığı barədə mesaj görünəcək.
Xatırladaq ki, fövqəladə xəbərdarlıq sistemi ilk dəfə 2023-cü ilin aprelində sınaqdan keçirilib. O vaxt bəzi istifadəçilərin cihazlarında siqnalın işləməməsi müşahidə olunub, problemin müəyyən mobil şəbəkələrlə bağlı olduğu açıqlanıb.
Hökumət sistemi bundan əvvəl güclü hava şəraiti ilə bağlı xəbərdarlıqlar və ötən il İkinci Dünya müharibəsindən qalmış partlamamış bombanın hərbçilər tərəfindən zərərsizləşdirilməsi zamanı da istifadə edib.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
