Britaniyada orta yaşlı qadınların beşdəbiri depressiyadan əziyyət çəkir
London, 19 noyabr, AZƏRTAC
Britaniyada aparılan yeni tədqiqat göstərir ki, ölkədə 55–64 yaş aralığındakı qadınların beşdəbiri, yəni, 21 faizi depressiya əlamətləri yaşayır.
AZƏRTAC “The Telegraph”a istinadla xəbər verir ki, Maliyyə Araşdırmaları İnstitutunun (IFS) hesabatına görə, bu göstərici 2010-cu illərin ortalarında 15 faiz idi və son illərdə ciddi artım müşahidə olunub. Hesabatda qeyd olunur ki, qadınlarda depressiya əlamətlərinə həyatdan həzz almama, təkliyə qapanma, kədər hissi və yuxu pozuntuları daxildir.
Eyni yaş qrupunda kişilərdə isə bu göstərici 11 faiz təşkil edir və son on ildə demək olar ki, dəyişməyib.
Orta yaşdan sonrakı dövrdə qadınlar arasında yalnız psixoloji deyil, fiziki sağlamlıq şikayətlərində də artım qeydə alınıb. Tədqiqat göstərir ki, bu yaş aralığındakı qadınların 11 faizi altı və daha çox sağlamlıq problemi yaşadığını bildirib, kişilərdə isə bu rəqəm cəmi 3 faiz təşkil edir. Pandemiya, həyat xərclərinin kəskin artması, eləcə də qadınlar üçün dövlət pensiyası yaşının yüksəldilməsinin psixoloji sağlamlığa təsir göstərən amillər olduğu qeyd olunub.
Hesabatda, həmçinin bildirilir ki, depressiya əlamətləri azgəlirli ailələrdə yaşayan qadınlar arasında daha geniş yayılıb. Belə ki, ən aşağı gəlir qrupunda olan 55–64 yaşlı qadınların dörddə birinə yaxını depressiya yaşadığını bildirib. Ən yüksək gəlir qrupunda isə bu göstərici cəmi 10 faizdir.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
