BSU-nun XVI beynəlxalq elmi konfransının bölmə iclası Gəncədə təşkil edilib
Bakı, 31 may, AZƏRTAC
Bakı Slavyan Universitetinin (BSU) Ulu Öndər Heydər Əliyevin anadan olmasının 102-ci ildönümünə həsr edilmiş “Azərbaycanşünaslığın aktual məsələləri. Yeni dövrün Azərbaycanı” adlı XVI beynəlxalq elmi konfransı Gəncədə keçirilib.
Universitetdən AZƏRTAC-a bildirilib ki, konfrans iştirakçıları əvvəlcə Gəncə şəhərində Ulu Öndər Heydər Əliyevin abidəsini ziyarət edərək önünə gül dəstələri düzüblər. Daha sonra onlar Heydər Əliyev Mərkəzinin foyesində Ümummilli Liderin həyat və fəaliyyətinə həsr edilmiş sərgi ilə tanış olublar.
Plenar iclasda Ulu Öndərin həyat yolunu əks etdirən videoçarx nümayiş etdirilib.
Çıxış edən BSU-nun rektoru Anar Nağıyev “Azərbaycanşünaslığın aktual məsələləri” mövzusunda keçirilən beynəlxalq elmi konfransın regional bölmələrinin artıq ənənə halını aldığını qeyd edib. Bildirib ki, əvvəlki illərdə konfransın regional bölmələri Lənkəran Dövlət Universiteti (LDU) və Azərbaycan Dövlət Pedaqoji Universitetinin (ADPU) Quba filialı ilə birgə olaraq Lənkəran və Quba şəhərlərində təşkil edilib.
A.Nağıyev mayın 7 və 8-də BSU-da keçirilən beynəlxalq elmi konfransın məqsədinin müasir dövrün Azərbaycanı ilə bağlı qlobal və milli çağırışların elmi müstəvidə müzakirəsi olduğunu vurğulayıb. Qeyd edib ki, builki konfransa Azərbaycan, Türkiyə, Rusiya, Şimali Makedoniya və İndoneziyadan ümumilikdə 255 müraciət daxil olub, onlardan 167-si məruzə üçün qəbul edilib. İki gün ərzində 4 dildə keçirilən bölmə iclaslarında 142 məruzə dinlənilib. Bu bölmələrdə “Heydər Əliyev və Güclü Azərbaycan”, “Qərbi Azərbaycan: milli irs və qayıdış hüququ”, “Yeni dövrün çağırışları: milli ideya və gələcəyə baxış”, “Konstitusiya və suverenlik”, “Müharibə və postmüharibə dövrü ədəbiyyatda və incəsənətdə”, “Yeni geosiyasi mərkəz – Türk dünyası” kimi mühüm istiqamətlər üzrə aktual mövzular müzakirə olunub.
Plenar iclasda çıxış edən Gəncə Şəhər İcra Hakimiyyəti başçısının müavini Adil Tağıyev bu cür beynəlxalq səviyyəli elmi konfransların bölgələrdə təşkilinin əhəmiyyətini vurğulayaraq, konfransın Gəncədə keçirilməsini şəhərin elmi və ictimai həyatında mühüm hadisə kimi dəyərləndirib.
GDU-nun rektoru Yusif Yusibov, ADAU-nun rektoru Zəfər Qurbanov, Yeni Azərbaycan Partiyası (YAP) Gəncə şəhər təşkilatının sədri Bayram Aslanov, Milli Məclisin deputatı Vüqar Rəhimzadə və ATU-nun prorektoru Şahmar Həsənov çıxış edərək, Ulu Öndər Heydər Əliyevin azərbaycançılıq məfkurəsi, müstəqil Azərbaycanın inkişaf yolu, Prezident İlham Əliyevin rəhbərliyi ilə əldə edilən nailiyyətlər və zəfər tariximiz barədə fikirlər səsləndiriblər.
Plenar iclasdan sonra konfransın bölmə iclası öz işinə başlayıb. BSU-nun Azərbaycan tarixi və multikulturalizm kafedrasının müdiri Əsgər Əhmədin moderatorluğu ilə baş tutan iclasda BSU, GDU və ADAU nümayəndələri tərəfindən məruzələr təqdim olunub.
Bölmənin digər xəbərləri
