Bu il Pedaqoji Universitetin Şamaxı filialından 138 tələbə məzun olur
ADPU-nun Şamaxı filialında “Məzun günü” keçirilib
Bakı, 2 iyun, AZƏRTAC
Azərbaycan Dövlət Pedaqoji Universitetinin (ADPU) Şamaxı filialında “Məzun günü” keçirilib.
ADPU-nun Şamaxı filialından AZƏRTAC-a bildirilib ki, tədbirdə filialın direktoru dosent Tünzalə Yusifova çıxış edərək Azərbaycanda təhsilə göstərilən dövlət qayğısından söz açıb. “Dövlətimizin təhsilə, eləcə də gənclərin intellektual, mənəvi və vətənpərvərlik ruhunda inkişafına göstərdiyi böyük diqqət və qayğının nəticəsidir ki, bu gün ADPU-nun Şamaxı filialında vətənpərvər, savadlı, məsuliyyətli və təşəbbüskar gənclik yetişir”, - deyə Tünzalə Yusifova qeyd edib. O vurğulayıb ki, filial öz fəaliyyəti ilə regionda təhsilin inkişafına və kadr potensialının güclənməsinə mühüm töhfələr verir: “Məzunlarımız bu gün təkcə müəllim kimi deyil, eyni zamanda, müxtəlif sahələrdə - dövlət və özəl qurumlarda, təhsil müəssisələrində, sosial layihələrdə və ictimai fəaliyyətlərdə uğurla fəaliyyət göstərirlər. Onların əldə etdiyi bilik, bacarıq və formalaşdırdıqları dəyərlər bu filialda təməli qoyulmuş sağlam təhsil və psixoloji mühitin nəticəsidir. Ümumilikdə bu il 6 ixtisas üzrə 138 məzun filialı bitirərək ölkənin müxtəlif təhsil müəssisələrində fəaliyyətə başlayacaq. Sevindirici haldır ki, bu tədris ilində Şamaxı filialında müəllimlik ixtisasları ilə yanaşı, təhsildə sosial-psixoloji xidmət ixtisasının da ilk məzunlarını yola salırıq”.
Təhsil aldıqları müddətdə təhsildə və ictimai-sosial fəallıqları ilə seçilən bir sıra məzunlara filialın rəhbərliyi tərəfindən fəxri fərman və təşəkkürnamələr təqdim olunub.
Tədbirdə Regional İnkişaf İctimai Birliyinin (RİİB) Dağlıq Şirvan Regional bölməsinin rəhbəri Nərgiz Qurbanova bildirib ki, ADPU-nun Şamaxı filialında tələbələrin intellektual və şəxsi inkişafı üçün çox gözəl şərait yaradılıb: “Tələbələrin könüllülük fəaliyyətinə geniş imkanlar yaradılır və bu da onların müxtəlif təşkilatlarda, o cümlədən RİİB çərçivəsində çoxşaxəli sahələrdə uğurla fəaliyyət göstərməsinə şərait yaradır. Biz bu əməkdaşlığı yüksək qiymətləndiririk”.
Tədbirin davamında məzunlar təhsil aldıqları illərlə bağlı təəssüratlarını, qürurlu və kövrək anlarını bölüşüb, filialın rəhbərliyinə, müəllimlərinə və valideynlərinə təşəkkürlərini bildiriblər. Onların valideynləri də bu illər ərzində tələbələr üçün yaradılan şəraitə görə filialın rəhbərliyinə təşəkkür ediblər.
Bölmənin digər xəbərləri
