Bu il respublika ərazisində maqnitudası 3-dən yuxarı olan 61 zəlzələ qeydə alınıb
Bakı, 29 dekabr, AZƏRTAC
Bu il Respublika Seysmoloji Xidmət Mərkəzi tərəfindən 62 rəqəmsal stansiyanın məlumatları əsasında respublika ərazisində seysmikliyin analizi aparılıb. Mərkəz tərəfindən bu günə qədər ümumilikdə 14 min 652 yeraltı təkan qeydə alınıb. Onlardan 3960-ı yerli, yəni Azərbaycan ərazisində, 7975-i isə Azərbaycan və ona bitişik ərazilərdə baş verən zəlzələlərdir.
Mərkəzin informasiya şöbəsindən AZƏRTAC-a bildiriblər ki, Azərbaycan və ona bitişik ərazilərdə 2021-ci ildə 17 hiss olunan zəlzələ qeydə alınıb. Həmçinin respublika ərazisində maqnitudası 3-dən yuxarı olan 61 zəlzələ olub.
Bildiriblər ki, il ərzində Şamaxı-İsmayıllı, Ağstafa, Naxçıvan Muxtar Respublikasının Şahbuz rayonunda, eləcə də Qusar-Quba, Talış zonalarında aktivlik yüksək olub. Böyük Qafqazın cənub-şərq yamacında, Zaqatala-Balakən bölgəsində seysmiklik zəif olub. Bununla yanaşı, Xəzər dənizində seysmikliyin fon səviyyəsində olması müşahidə olunub. İran-Türkiyə sərhədində, Gürcüstan-Ermənistan sərhədində seysmiklik yüksək olub. Bundan başqa, Şıxzəhirli, Quşçu və Xəzər dənizindəki Daşlı palçıq vulkanlarında püskürmə qeydə alınıb.
Bölmənin digər xəbərləri
