Budapeşt xəbərdarlıq edir: Aİ qaçqın olmayan miqrantların üzünə qapıları açır
Budapeşt, 4 mart, AZƏRTAC
Budapeşt milyonlarla əməkçi miqrantlar üçün Aİ-nin qapılarını açmaq istəyir, halbuki bu insanların niyyətləri Avropa üçün həmişə təhlükəli olub.
AZƏRTAC xəbər verir ki, Macarıstanın FİDES hakim parlament partiyasının mətbuat katibi Yanoş Xalas bu fikri Debretsen şəhərində keçirilən mətbuat konfransında söyləyib.
“Söhbət qaçqınlardan yox, ondan gedir ki, Avropa milyonlarla əməkçi miqrantların üzünə qapıları taybatay açır”, - deyən Xalas daha sonra əlavə edib ki, həqiqi qaçqınlarla birlikdə əməkçi miqrantlar da qeyri-leqal şəkildə Avropaya gəlirlər. Xalas Brüsselin miqrasiya siyasəti ilə əlaqədar Macarıstan hökumətinin ittihamlarının Avropa Komissiyası tərəfindən təkzib olunmasına istinad edərək deyib: “Brüssel bizim göstərdiyimiz aşkar faktları təkzib etmək əvəzinə təsdiqləyib ki, o, həqiqətən milyonlarla əməkçi miqrantı buraya gətirmək istəyir”.
Yanoş Xalas Avropa Komissiyasının prezidenti Jan-Klod Yunkerin və maliyyəçi Corc Sorosun təsvir edildiyi plakatlarla təşviqat kampaniyasına son qoymaq barədə Avropa Xalq Partiyasının rəhbəri Manfred Veberin tələbi, habelə Belçika Xristian Partiyasının FİDES-in ümumavropa partiya alyansından çıxarılması tələbi ilə əlaqədar bildirib ki, onun hökumətinin vəzifəsi Avropa dəyərlərini qorumaqdan və miqrasiyanı dayandırmaqdan ibarətdir. O deyib: “Macarıstan xalqı sonuncu ümumi seçkilərdə bu siyasəti bəyənib. Bizim üçün macar xalqının fikri ümumavropa partiya intizamından daha əhəmiyyətlidir. Biz Macarıstanda Brüsselin mənafeyini və fikrini yox, Brüsseldə macar xalqının mənafeyini və fikrini təmsil edirik”.
Bölmənin digər xəbərləri
