Buraxılış imtahanında 300 bal toplayan şagird: Hədəfim gələcəkdə kibertəhlükəsizlik mütəxəssisi olmaqdır
Bakı, 18 aprel, Xatirə Cəfərova, AZƏRTAC
Bakı şəhəri 313 nömrəli tam orta məktəbin XI sinif şagirdi Fərid Mehdiyev Dövlət İmtahan Mərkəzinin martın 9-da keçirdiyi buraxılış imtahanında 300 bal toplayaraq maksimum nəticə göstərib.
Təəssüratlarını AZƏRTAC-ın müxbiri ilə bölüşən Fərid deyib: “Test tapşırıqları abituriyentlərin səviyyəsinə uyğun tərtib edilmişdi. Düzdür, çətinlik çəkdiyim tapşırıqlar da oldu, amma ümumilikdə imtahan təlimata uyğun şəkildə keçirildi”.
Fəridin arzusu Bakı Ali Neft Məktəbində informasiya təhlükəsizliyi üzrə təhsil almaqdır. O, boş vaxtlarında, adətən, kompüter proqramları ilə məşğul olur. “Kompüter proqramları uşaqlıqdan maraq dairəmdə olub. Ancaq boş vaxtımın önəmli bir hissəsini də dincəlməyə və əyləncəyə ayırırdım. Çünki effektiv hazırlaşmaq səhər-axşam çalışmaq deyil, əksinə, çalışmaq və dincəlmək arasındakı balansı saxlamaqdır”.
Fəridin məqsədi informasiya təhlükəsizliyi ixtisası üzrə ali və magistratura təhsili almaqdır. Onun hədəfi bu sahəni dərinliklərinə qədər öyrənmək, gələcəkdə kibertəhlükəsizlik mütəxəssisi olmaqdır. O, magistratura təhsilini isə xarici universitetlərdə almaq istəyir. Fəridi təbrik edir və ona bu yolda uğurlar arzulayırıq.
Bölmənin digər xəbərləri
