Burkina Fasoda terrorçu qruplaşma üzvləri ilə toqquşmada 53 əsgər həlak olub
Bakı, 6 sentyabr, AZƏRTAC
Burkina Faso təhlükəsizlik qüvvələrinin ən azı 53 üzvü ölkənin şimalında terrorçu qruplaşma ilə şiddətli toqquşma zamanı həlak olub.
AZƏRTAC “AlJaazira”ya istinadla xəbər verir ki, bu barədə Burkina Faso Ordusu məlumat yayıb.
Ordunun çərşənbə axşamı yaydığı bəyanatda deyilir ki, bazar ertəsi Yatenqa əyalətinin Koumbri kommunasına terrorçuların hücumu zamanı 17 əsgər və 36 könüllü həlak olub. “Bu, cəzasız qalmayacaq. Terrorçu ünsürlərin zərərsizləşdirilməsi üçün hər cür səy göstərilir”, - deyə bəyanatda bildirilib. Həmçinin döyüşlərdə silahlı qruplaşmanın onlarla üzvünün öldürüldüyü və döyüş texnikalarının məhv edildiyi vurğulanıb.
Burkina Faso İŞİD və Əl-Qaidə ilə əlaqəli silahlıların tez-tez hücumlarına məruz qalır ki, bu da minlərlə insanın ölümünə, iki milyondan çox insanın didərgin düşməsinə və on minlərlə insanın aclıq həddinə çatmasına səbəb olub.
Bölmənin digər xəbərləri
