Buxarestdə parlament işçiləri əməkhaqlarının azaldılmasına qarşı etiraz ediblər

19.11.2025 [15:19]
Çap et
A⁺ A^-

Buxarest, 19 noyabr AZƏRTAC

Rumıniya Parlamentinin aşağı palatasının əməkdaşları maaşların azaldılması planlarına etiraz olaraq qurumun daxilində gözlənilməz aksiya keçiriblər. Etirazçılar palata sədri Sorin Qrindeanunun kabineti qarşısına toplaşaraq “Biz layiqli maaş tələb edirik”, “Bizimlə məsxərə edirsiniz”, “Dövlət yatır, işçi dözür” kimi şüarlar səsləndiriblər. Onların qaldırdığı plakatlarda “Rəzil maaş. Artıq susmayacağıq”, “Bizim işimiz dövlətin fəaliyyətini təmin edir” kimi ifadələr yer alıb.

Etirazın səbəbi Rumıniya hökumətinin rekord səviyyəyə çatan büdcə kəsirini (2024-cü ildə ÜDM-in 9,3 faizi) azaltmaq üçün hazırladığı qənaət paketləridir. Tədbirlər ƏDV və aksizlərin artırılmasını, subsidiyaların ləğvini, əməkhaqları və pensiyaların dondurulmasını, həmçinin yerli və mərkəzi qurumlarda struktur islahatlarını nəzərdə tutur.

Ekspertlər hesab edirlər ki, qənaət tədbirlərinin parlament aparatına belə təsir etməsi dövlət sektorunda narazılığın daha da artacağına işarədir.

İqbal Hacıyev

AZƏRTAC-ın xüsusi müxbiri

Buxarest