CABİR NOVRUZUN ŞERLƏRİNƏ BƏSTƏLƏNMİŞ MAHNILAR

18.01.2004 [12:44]
Çap et
A⁺ A^-

Əməkdar incəsənət xadimi, bəstəkar Mirfaiq Sücəddinov xalq şairi Cabir Novruzun şerlərinə bəstələnmiş mahnıları nota köçürmək və kitab şəklində buraxmaq üçün apardığı yaradıcılıq işlərini başa çatdırmışdır.

Bəstəkar AZƏRTAC-ın müxbirinə bildirmişdir ki, mərhum şairin şerlərinə yazılmış məşhur mahnılardan ibarət not kitabı “Vətəndən pay olmaz” adlanacaqdır. Həmin kitaba 1982-ci ildən başlayaraq, Cabir Novruzun şerlərinə yazılmış 22 mahnının notları daxil ediləcəkdir.

Eyni zamanda, yüksək poliqrafik nəşrlə çap olunacaq kitabda not yazıları ilə bərabər, şerlərin mətni də öz əksini tapacaqdır.

Qeyd edilmişdir ki, kitab işıq üzü gördükdən sonra eyni adlı musiqi albomunun və kompakt diskin buraxılması da nəzərdə tutulmuşdur.