Camal Alxasov: Təkərli oturacaq üzərində hərəkət etmək çox rahatdır
Bakı, 10 mart, AZƏRTAC
2019-cu ildə Azərbaycan Milli Ordusunda hərbi xidmətə çağırılmışam və ötən ilin payızında hərbi xidmət müddətim başa çatırdı. Sentyabrın 27-də başlanılan Vətən müharibəsində mən də Milli Ordumuzun azğın düşmənə qarşı keçirilən əks-hücum əməliyyatında iştirak etdim. Füzuli, Cəbrayıl və Qubadlı uğrunda gedən döyüşlərin iştirakçısıyam. Hərbi hissədə sürücü idim, oktyabrın 31-də səhər Qubadlıda erməni hərbi birləşmələrindən azad edilən hərbi hissədə sükan arxasında düşmən ordusunun atəşinə tuş gəldim. İki ayağımı və bir əl barmağımı itirmişəm. Lakin torpaqlarımızın işğalçılardan təmizlənməsində pay sahibi olduğuma görə qürur hissi keçirirəm.
AZƏRTAC xəbər verir ki, bu sözləri Vətən müharibəsində yaralanan qazilərdən olan Camal Alxasov Dövlət Tibbi-Sosial Ekspertiza və Reabilitasiya Agentliyinin Protez-Ortopedik İstehsalat və Reabilitasiya Mərkəzində mühərrikli təkərli oturacaqla təmin edilərkən deyib.
Camal Türkiyənin Wollex sirkətinin istehsal etdiyi mühərrikli təkər oturacaqla təmin edilən ilk qazilərdən olduğunu bildirib. Onun dediyinə görə, ona təqdim olunan oturacaqdan həm qapalı, həm də acıq məkanlarda istifadə etmək olar: “Oturacağın qabaq təkərləri öz ətraflarında tamamilə dönmə qabiliyyətinə malikdir. Djostik üzərində rahatlıq ucun sükan qolu və səsli xəbərdarlıq düyməsi var. Beş pilləli surət səviyyəsi və tənzimləmə düyməsinin olması istifadəçinin rahatlığı üçün düşünülüb. Onun üzərində hərəkət etmək çox rahatdır. Ona görə də bizi bu cür rahat mühərrikli təkərli oturacaqla təmin etdiyinə görə Əmək və Əhalinin Sosial Müdafiəsi Nazirliyinə öz minnətdarlığımı bildirirəm”.
Bölmənin digər xəbərləri
