Cari ilin altı ayı ərzində dövlət qurumlarına 504 kiberhücum indikatoru müəyyən olunub
Bakı, 3 iyul, AZƏRTAC
Bu ilin yanvar-iyun aylarında Xüsusi Rabitə və İnformasiya Təhlükəsizliyi Dövlət Xidməti (XRİTDX) dövlət qurumlarına 504 kiberhücum indikatoru (IOC) müəyyən edib.
AZƏRTAC XRİTDX-in Kompüter insidentlərinə qarşı mübarizə mərkəzinin yaydığı hesabata istinadla xəbər verir ki, bu göstərici ötən ilin müvafiq dövrü ilə müqayisədə 1,2 faiz çoxdur.
Belə ki, kibertəhdidlərin 198-i daxili araşdırma, 306-sı isə dövlət qurumlarından daxil olmuş insidentlərin araşdırılması əsasında müəyyən edilib və bloklanıb.
Təkcə bu ilin iyun ayında 51 kiberhücum müəyyən olunub ki, bu da ötən ilin müvafiq dövrü ilə müqayisədə 61 faiz azdır.
Hesabat dövründə “AzStateNet” şəbəkəsi üzrə 262,92 milyon zərərli keçid, son istifadəçilərdə quraşdırılan mərkəzi antivirus sistemi vasitəsilə 12 milyon 366 min 400, “Sandbox” mühafizə sistemi vasitəsilə isə 61 min 482 zərərverici tərkibli elektron sənəd blok edilib.
Bu ilin ilk altı ayı ərzində Xüsusi Rabitə və İnformasiya Təhlükəsizliyi Dövlət Xidməti dövlət qurumları üçün yaradılmış dövlət elektron poçt xidmətində 7 milyon 455 min 124 elektron məktubu emal edib. Onlardan 6 milyon 103 min 281-i istifadəçilərə çatdırılıb, 1 milyon 351 min 843-ü isə zərərli tərkibli olduğu üçün bloklanıb. Təkcə II rübdə 643 min 971 zərərli tərkibli məktub bloklanıb ki, bu da ötən ilin eyni dövrü ilə müqayisədə 23 faiz çoxdur.
Bölmənin digər xəbərləri
