Cəlil Xəlilov: Təşkilatımız Vətən müharibəsi veteranları ilə öz sıralarını sürətlə genişləndirməkdədir
Bakı, 3 iyul, AZƏRTAC
Təşkilatımız Vətən müharibəsi veteranları ilə öz sıralarını sürətlə genişləndirməkdədir. Bu, veteranlarımızın ictimai aktivliyi ilə yanaşı, təşkilatımıza olan münasibətini əks etdirir.
Bunu AZƏRTAC-a açıqlamasında Müharibə, Əmək və Silahlı Qüvvələr Veteranları Təşkilatının sədr müavini, polkovnik Cəlil Xəlilov bildirib.
Polkovnik qeyd edib ki, təşkilatın əsas vəzifələrindən biri ən çox diqqət və qayğıya ehtiyacı olan, Azərbaycan dövlətinin daim diqqət mərkəzində olan müharibə veteranlarının aidiyyəti dövlət orqanları ilə əlaqələndirmək, onları düşündürən məsələləri müvafiq qurumlar qarşısında qaldırmaqdır. “Bütün kateqoriyadan olan veteranların sosial durumunun diqqətdə saxlanılması təşkilatımızın əsas vəzifələrindən biri olaraq qalır. Bildiyiniz kimi, dövlətimiz şəhid ailələri, müharibə əlilləri, qazi və müharibə veteranlarının sosial vəziyyətinin mütəmadi olaraq yaxşılaşdırılmasını daim diqqət mərkəzində saxlayır, bu yöndə miqdarı milyard manatlarla hesablanan nəhəng layihələr həyata keçirir. Məhz dövlətimizin məlum qayğısının nəticəsidir ki, bu gün Azərbaycan həssas kateqoriyadan olan vətəndaşlara göstərilən diqqət və qayğıya görə dünyanın bəlkə də ən qabaqcıl dövlətidir. Təbii, bu məsələdə dövlətlə yanaşı, qeyri-hökumət təşkilatları, vətəndaş cəmiyyəti institutları da aktiv rol oynamalı, dövlətin şəhid ailələri, veteranlarla bağlı siyasətinə dəstək verməli, hansısa məmurun laqeyd münasibəti ilə üzləşən veteranların səsinin dövlətə çatdırılmasında yaxından iştirak etməlidir. Unutmamalıyıq ki, həssas kateqoriyadan olan vətəndaşlarımıza yardım etmək, onların arzu və istəklərinə ikiqat diqqətlə yanaşmaq hər birimizin mənəvi borcudur və hər bir azərbaycanlı bu borca sədaqətlə yanaşmalıdır”, - deyə Cəlil Xəlilov qeyd edib.
Təşkilatın sədr müavini diqqətə çatdırıb ki, vətəndaşın dövlətlə, onun əlaqədar qurumları ilə əlaqələndirilməsi, problemin qarşılıqlı anlaşma əsasında həlli, vətəndaş hüquqlarının təmin edilməsi, dövlət siyasətinin dəstəklənməsi baxımından olduqca önəmlidir. O, bunun həm də antimilli qüvvələrin dövlətimizlə bağlı çirkin məqsədlərinin qarşısını almaq baxımından vacibliyini vurğulayaraq deyib: “Bildiyiniz kimi, bəzi qüvvələr var ki, onlar xalqla-dövlət, vətəndaşla-hökumət arasında süni gərginlik yaratmağa, öz məkrli niyyətlərinə nail olmağa çalışır. Bunun üçün isə onlar çox vaxt gənclərdən, eləcə də veteranlardan istifadə etməyə səy göstərirlər. Buna görə də Müharibə, Əmək və Silahlı Qüvvələr Veteranları Təşkilatı paytaxt və bölgələrdə keçirdiyi çoxsaylı görüşlərdə, konfrans və forumlarda geniş maarifləndirmə işləri həyata keçirir. Bildiririk ki, hər bir vətəndaş onda narazılıq doğuran məsələ ilə bağlı əlaqədar dövlət qurumuna müraciət etməli, problemin hüquqi müstəvidə həllinə nail olmalıdır. Bu baxımdan onlar bizim Təşkilatımız vasitəsi ilə də öz səslərini istənilən dövlət qurumuna çatdıra bilərlər. Biz bu günə qədər olduğu kimi, bundan sonra da veteranlarımıza bu və digər məsələlərdə dəstək olmağa, onlara əlimizdən gələn köməkliyi göstərməyə hazırıq”.
Polkovnik bildirib ki, son vaxtlar 44 günlük Vətən müharibəsi iştirakçılarının Müharibə, Əmək və Silahlı Qüvvələr Veteranları Təşkilatına kütləvi şəkildə üzv olması gənclərin, veteranların bu təşkilata olan münasibətini əks etdirir. “Bizim üçün qürurvericidir ki, 44 günlük Vətən müharibəsi iştirakçısı olan gənclərimiz kütləvi şəkildə təşkilatımıza üzv olur, onun fəaliyyətində yaxından iştirak edirlər. Bu, gənclərimizin aktivliyinin göstəricisi olmaqla yanaşı, həm də onların təşkilata olan münasibətini əks etdirir. Təbii, üzləşdiyimiz bu mənzərə bizi çox sevindirir, eyni zamanda, bizim çiynimizdəki məsuliyyət hissini artırır. Mən inanıram ki, Müzəffər Ali Baş Komandan İlham Əliyevin diqqət və qayğısı, dövlətimizin dəstəyi ilə bundan sonra da veteranlarımızı düşündürən bütün məsələlərin həllinə nail olacaq, dövlət və xalq olaraq bütün hədəflərimizi gerçəkləşdirəcəyik. Unutmayaq ki, bütün uğurlarımızın, qələbələrimizin açarı birliyimizdədir və bu birliyi daim qorumaq bizim hər birimizin mənəvi borcumuzdur”, - deyə Cəlil Xəlilov vurğulayıb.
Bölmənin digər xəbərləri
