Cəlilabadda şəhid Cavid Hüseynovun xatirəsinə inşa edilmiş bulaq istifadəyə verilib VİDEO
Cəlilabad, 1 aprel, Bağır Əliyev, AZƏRTAC
Aprelin 1-i Vətən müharibəsində şəhidlik zirvəsinə ucalmış cəlilabadlı tankçı Cavid Hüseynovun doğum günüdür. Ömrünün 27-ci baharını qeyd etmək ona nəsib olmasa da, igid döyüşçünün seçdiyi yol və ucaldığı məqam bir ömür qədər şərəflidir...
AZƏRTAC-ın bölgə müxbiri xəbər verir ki, şəhid Cavid Hüseynovun doğum günündə dünyaya göz açdığı Hamarqışlaq kəndində onun xatirəsinə inşa edilmiş bulağın açılışı olub.
Xüsusi karantin rejiminin tələblərinə riayət olunmaqla keçirilən mərasimdə çıxış edənlər igid döyüşçünün Vətən müharibəsində göstərdiyi qəhrəmanlıqlardan danışıblar.
Hərb sənətinə olan sonsuz marağı Cavid Hüseynovu 2016-cı ildən Milli Ordu sıralarına gətirmişdi. Vətən müharibəsindən əvvəl qardaş Türkiyə ilə keçirilən birgə hərbi təlimlərdə tankla hədəfləri dəqiqi vurduğuna görə birinci yerə layiq görülmüşdü. Onun döyüş yolu xidmət etdiyi Füzuli rayonu istiqamətindən başlanıb.
Cavid Hüseynovun Vətən müharibəsində göstərdiyi döyüş rəşadəti, yüksəldiyi uca məqamla valideynləri qürur hissi keçirirlər.
Anası Xatirə Hüseynova oğlu ilə fəxr etdiyini deyərək onun telefonla son danışığını bir daha xatırladı: “Axırıncı dəfə mənə zəng edib dedik ki, ana, torpaqlarımız işğal altındadır, onları azad eləmək üçün biz getmişik...”.
Füzuli istiqamətində əks-hücum əməliyyatı zamanı Cavidin olduğu tank minaya düşsə də, o və ekipaj üzvləri xilas ola biliblər. Lakin növbəti hərbi tapşırığı yerinə yetirərkən igid döyüşçü qəhrəmancasına şəhid olub.
Cavidin atası Habil Hüseynov oğlunun Vətən müharibəsində göstərdiyi qəhrəmanlıqdan qürur hissi keçirdiyini bildirib: “Komandirləri Cavidin müharibədə göstərdiyi şücaətdən fərəhlə danışırdılar. Deyirdilər ki, yaşının az olmasına baxmayaraq, cəbhədə əsl qəhrəmanlıq göstərirdi...”.
Qardaşı Ceyhun Hüseynov onunla son telefon danışığını xatırlatdı: “Atamı, anamı ağlamağa qoyma, onlar sənə əmanət. Mən həmin danışıqdan sonra vəziyyətin nə yerdə olduğunu anladım...”.
Cavidin doğum günündə otağını təzə-tər yaz çiçəkləri, çələnglər bəzəyir. Doğulduğu kənddə onun adına çəkilmiş bulaq isə bundan sonra həm də ürəkləri sərinləşdirəcək...
Qeyd edək ki, şəhid Hüseynov Cavid Habil oğlu 1 aprel 1994-cü il tarixində Cəlilabad rayonunun Hamarqışlaq kəndində anadan olub. O, 2014-cü ildə hərbi xidmətini basa vurduqdan sonra müddətdən artıq hərbi qulluqçu, tank atıcısı kimi yenidən xidmətə başlayıb.
İgid döyüşçü Vətən müharibəsində əks-hücum əməliyyatlarında Füzuli rayonu uğrunda gedən döyüşlərdə bir çox kəndlərin və yüksəkliklərin alınmasında fəal iştirak edərək düşmənin xeyli sayda canlı qüvvəsini məhv etmişdi. Sentyabrın 29-da onun tankı minaya düşsə də, sonralar yenə də döyüşü davam etdirib...
Şəhid Cavid Hüseynov 30 sentyabr 2020-ci il tarixində Füzuli rayonu uğrunda gedən döyüşlərdə qəhrəmancasına şəhid olub.
Cəsur döyüşçü ölümündən sonra Azərbaycan Respublikası Prezidentinin müvafiq Sərəncamları ilə “Vətən uğrunda” ordeni və “Füzulinin azad olunmasına görə” medalı ilə təltif olunub. O, doğulduğu Hamarqışlaq kəndində dəfn olunub.
Bölmənin digər xəbərləri
