CƏMİYYƏT ÖZÜ ƏTRAF MÜHİTİN MÜHAFİZƏSİNDƏ MARAQLI OLMALIDIR
Nazir bildirmişdir ki, “Kompleks Tədbirlər Planı” mühüm sənəddir və bəzi nazirliklərin birgə fəaliyyətinin məhsuludur. Burada nəzərdə tutulan hər bir tədbirə bir neçə idarə cəlb olunmuşdur. Lakin ətraf mühitin mühafizəsi məsələləri təkcə nazirlik və komitələrin icrası üçün vəzifə borcu olmamalıdır. Cəmiyyət özü təbiətə istehlakçı münasibətini daha müdrik və uzaqgörən münasibətlə əvəzləməlidir. Axı, bugünkü biganəlik gələcək nəsillər üçün qlobal ekoloji fəlakətlə nəticələnə bilər.
Sənəd çərçivəsində Ekologiya və Təbii Sərvətlər Nazirliyinin fəaliyyətinin hərtərəfli xarakter daşıdığı vurğulanmışdır: ekoloji nəzarətin sürətini və miqyasını artırmaq, “Plan”a cəlb olunmuş dövlət qurumlarına əlaqələndirmə və məsləhət yardımı etmək, “Azərsu” Səhmdar Cəmiyyəti ilə birlikdə kəndlərdə sutəmizləyən modul qurğularının quraşdırılmasına dair layihələri gerçəkləşdirmək. Nazir demişdir ki, bütövlükdə suyun keyfiyyəti probleminin həlli fəaliyyətimizin “Plan”da müəyyən olunmuş öncül istiqamətlərindəndir. Qarşıdakı 5 il ərzində Abşeron yarımadasında təmizləyici qurğuların yeni nəslinin quraşdırılması, təmizlənmiş sudan irriqasiya məqsədləri üçün istifadə olunması nəzərdə tutulmuşdur.
Əslində, ən ağır ekoloji vəziyyət Bakı buxtasında yaranmışdır. Buxta çirkabla, tərkibində neft məhsulları, ağır metallar olan çoxillik çöküntülərlə zibillənmişdir. Axı, Bakının qocaman sakinlərinin yaxşı yadındadır ki, ötən əsrin 40-50-ci illərində bulvarda, dəniz akvatoriyasında sakinlər çimirdi. Burada sağlamlığa zərər vurmadan günəş vannası qəbul etmək olardı. Dövlətimizin başçısının imzaladığı sənəddə buxta ilə bağlı problemin həlli də əksini tapmışdır.
H.Bağırov Bakı buxtasına əvvəlki təmizliyin və şəffaflığın qaytarılmasının reallığı barədə suala cavabında bildirmişdir ki, nazirlik dənizi onun dibinə toxunmadan təmizləmək üsulunun tərəfdarıdır, çünki bu, çox bahalı layihədir. Qısa müddətdə tullantı sularının axıdılmasının qarşısını almaq, bütün təmizləyici qurğuları Hövsan qəsəbəsinə köçürmək, Bakı buxtasının sahilyanı zolağında fəaliyyət göstərən müəssisələrin şəhər kənarına çıxarılmasına dair təkliflər hazırlamaq nəzərdə tutulur. Bütün bunlar yaxın 5 ildə buxtadakı vəziyyəti əsaslı surətdə yaxşılaşdırmağa imkan verəcəkdir. Buna baxmayaraq, zərərli qatışıqlar hələ uzun müddət dənizin dibində qalacaqdır, lakin canlı orqanizm olan dəniz getdikcə öz-özünü təmizləyəcək, bu isə dəniz mühitinə yad maddələrin parçalanıb yox olmasına gətirib çıxaracaqdır.
“Plan”ın xeyli hissəsini paytaxtda və Abşeron yarımadasında ekoloji vəziyyəti yaxşılaşdırmaq tədbirləri təşkil edir. H.Bağırov şəhərsalmada bütün ekoloji normalara riayət ediləcəyi, yaşıllıqlara qayğı ilə yanaşılacağı və beləliklə, Bakı şəhərinin yeni simasının formalaşacağı ilə nəticələnəcək işlərin miqyasından danışaraq bildirmişdir ki, dövlətimizin başçısı qarşıya vəziyyətin əsaslı şəkildə dəyişdirilməsi vəzifəsini qoymuşdur. Abşeron yarımadasında 30 min hektar çirklənmiş torpaq var, bunun 15 min hektarı neft məhsulları ilə çirkləndirilmişdir. Bu torpaqların əsaslı rekultivasiyaya ehtiyacı var. Abşeronda çoxsaylı göllərin yaranma səbəblərini dəqiq müəyyənləşdirmək, onları qurutmaq, yaxud təmizləmək, ətraf əraziləri abadlaşdırmaq lazımdır. İstirahət zonalarında antisanitariya şəraitinin aradan qaldırılmasına dair proqramlar hazırlanaraq həyata keçiriləcəkdir.
Meşələrimizin sahəsinin genişləndirilməsi və vəziyyətinin yaxşılaşdırılması perspektivləri də diqqətdən qalmamışdır. Beynəlxalq Meşə Təşkilatının peykdən çəkilmiş şəkillərə əsaslanan son məlumatına görə, Azərbaycan ərazisinin cəmi 12,5 faizini meşələr təşkil edir. Ona görə də meşələrin bərpası və yeni meşə massivlərinin salınması ölkəmiz üçün xüsusilə aktualdır. Ekoloqlar son illərdə meşə fondu sahəsinin sabit şəkildə - 40 min hektaradək artdığını qeyd edirlər. Azərbaycanda hər il 4 min hektar sahədə meşələr salınır. H.Bağırov vurğulamışdır ki, intensiv heyvandarlığa, mal-qaranın qapalı yerlərdə bəslənilməsinə keçməklə meşə fondunun qorunub saxlanılması sahəsində vəziyyəti əsaslı şəkildə dəyişdirmək mümkündür. Hazırda meşə bərpası sahəsində sel təhlükəsi mövcud olan Şəki-Zaqatala zonasının çaylarında iri sahilbərkitmə layihəsi hazırlanır.
Bölmənin digər xəbərləri
