DÜNYA
CƏNUBİ ASİYADA MİNLƏRLƏ UŞAQ SOYUQDAN VƏ ACINDAN ÖLƏ BİLƏR
AZƏRTAC “Novosti” agentliyinə istinadla xəbər verir ki, BMT Uşaq Fondunun (YUNİSEF) məlumatına görə, Cənubi Asiyada oktyabrın 8-də baş vermiş zəlzələdən zərər çəkmiş minlərlə uşaq soyuqdan, acından və xəstəliklərdən ölə bilər. YUNİSEF-in icraçı direktoru Enn Veneman Nyu-Yorkda bildirmişdir ki, zəlzələdən ziyan çəkmiş rayonlarda evlərin əksəriyyəti dağılmışdır. Minlərlə uşağın həyatı təhlükə qarşısındadır. Zəlzələ zonasında uşaqların yalnız 60 faizi vaksinasiya edilmişdir.
YUNİSEF zərərçəkənlərə yardım çərçivəsində Pakistan, Hindistan və Əfqanıstanın dağılmış rayonlarına tərkibində yüksək dərəcədə protein olan peçenye, uşaq ayaqqabısı, paltar, çadırlar və s. göndərmək niyyətindədir.
Enn Venemanın fikrincə, yaxın bir neçə həftə ərzində beynəlxalq xilasetmə missiyalarının əsas vəzifəsi uşaqlara kömək etməkdir. Zəlzələdən zərər çəkmiş uşaqların təqribən yarısının yaşı 18-dən azdır.