Cənubi Koreya Yaponiyadan Olimpiya Oyunlarında imperiya bayrağından istifadə etməməyi tələb edir
Bakı, 30 sentyabr, AZƏRTAC
Cənubi Koreya Yaponiyadan 2020-ci il Yay Olimpiya Oyunları vaxtı imperiya dövrünün bayrağının istifadəsini qadağan etməyi tələb edir.
AZƏRTAC xəbər verir ki, Cənubi Koreyanın qanunverici orqanı sentyabrın 30-da bununla bağlı müvafiq qərar qəbul edib. Qərarda Tokio Yay Olimpiya Oyunlarının təşkilat komitəsi yarış vaxtı tamaşaçıların imperiya dövrünün bayrağından və bayrağın elementləri əks olunan paltarlardan istifadəsini qadağan etməyə çağırılıb.
Qərarda bundan başqa, Cənubi Koreya hökuməti beynəlxalq ictimaiyyətin həmin bayrağın imperialist çağırışlar yayması barədə məlumatlandırılması istiqamətində fəaliyyəti və bayrağın bütün beynəlxalq tədbirlərdə istifadəsinin qarşısını almaq üçün diplomatik səyləri artırmağa çağırılıb.
Qeyd edək ki, 20-ci əsrin birinci yarısında Yaponiya imperiyasının istilasında olmuş koreyalılar həmin imperiya bayrağını yapon militarizminin rəmzi hesab edirlər. Cənubi Koreyada bayraqla bağlı indiki narahatlıq oyunların təşkilat komitəsinin yarışlar vaxtı həmin bayrağın istifadəsini məhdudlaşdırmaqla bağlı niyyətinin olmaması barədə mətbuatda dərc olunan yazılardan sonra yaranıb. Cənubi Koreyanın Xarici İşlər Nazirliyi sentyabrın əvvəlində bəyanat yayaraq, rəsmi Tokiodan həmin bayrağın istifadəsini qadağan etməyi tələb edib. Cənubi Koreya tərəfi fikrini belə əsaslandırıb ki, bayrağın istifadəsi idman yarışını siyasi mesajlar verən alətə çevirə bilər.
Bundan başqa, avqustda Cənubi Koreyanın İdman və Olimpiya Komitəsinin rəsmiləri Tokioya səfər zamanı yapon həmkarlarına məsələ ilə bağlı şikayətlərini çatdırıblar. Yaponiya tərəfi Cənubi Koreyanın istəyinə dəqiq cavab verməyib.
Bölmənin digər xəbərləri
