Cənubi Koreyada əriyən robotlar yaradılıb
Bakı, 31 avqust, AZƏRTAC
Cənubi Koreyada Seul Milli Universitetinin alimləri unikal - əriyən robotlar yaradıblar.
AZƏRTAC xarici KİV-lərə istinadla xəbər verir ki, robot gəzə, gizli məlumatları toplaya və heç kimin tapa bilməməsi üçün əbədi olaraq yoxa çıxa bilər.
Onlar tırtıllar kimi hərəkət edə bilirlər, sonra isə iz buraxmadan əriyib gedirlər.
Bu möcüzə robotları silikon qatrandan və ultrabənövşəyi işığa məruz qaldıqda flüor ionlarını buraxan xüsusi filmdən hazırlanıb. Normal rejimdə robot sıx, lakin viskoz konsistensiyaya malikdir. O, ən dar çatlara nüfuz edərək yeriyə bilir.
Robotun missiyası başa çatdıqda, insan operatoru yalnız bir düyməni basır - UV LED-lər yanır, bu da robotun dağılmasına səbəb olur. İki saatdan az müddətdə əriyəcək və yerə tez hopdurulan yağlı bir maye buraxacaq.
Kəşfiyyat zamanı özünü məhv etmə qabiliyyətinə malik robotlardan istifadə edilə bilər. Robot bütün lazımi məlumatları toplayanda kəşfiyyatçılara robotun yer üzündən yox olması üçün sadəcə düyməni basmaq kifayət edəcək. Beləliklə, məxfi məlumatların icazəsiz şəxslərə ötürülməsi riski minimuma endirilir.
Bundan əlavə, robotlar təhlükəli yerlərdə axtarış missiyalarında istifadə edilə bilər. Belə ki, missiya başa çatdıqdan sonra robot insanlara təhlükə yaratmadan məhv ediləcək.
Bölmənin digər xəbərləri
