Cənubi Koreyada işsizlik müavinəti üçün müraciətlər 13,3 faiz azalıb
Bakı, 11 mart, AZƏRTAC
Koreya Respublikasında fevral ayında işsizlik müavinəti üçün müraciətlərin sayı 13,3 faiz azalıb.
AZƏRTAC Cənubi Koreya Məşğulluq və Əmək Nazirliyinin məlumatına istinadla xəbər verir ki, fevral ayında işsizlik müavinətləri almaq üçün yeni müraciətlərin sayı 93,2 min təşkil edib ki, bu da ötən ilin eyni dövrü ilə müqayisədə 13,3 faiz azdır.
Müraciətlərin sayı əvvəlki ayla müqayisədə topdan və pərakəndə satış, istehsal və təhsil xidməti sahəsində azalsa da, informasiya və kommunikasiya sektorunda artıb. Dövlət məşğulluq sığortası fondu tərəfindən maliyyələşdirilən müavinətlər hökumət tərəfindən işsizlərə iş axtarmağa kömək üçün təklif olunur və işsizlik yardımlarının əksəriyyətini əhatə edir.
Statistikaya görə, fevral ayında işsizliyə görə müavinət alanların sayı 625,5 min nəfər olub ki, bu da bir il əvvəlki göstəricidən 1,1 faiz çoxdur. İş axtaranlara verilən ümumi ödəniş isə 8,5 faiz artaraq 731,4 milyon dollara çatıb.
Bölmənin digər xəbərləri
