Cevdet Yılmaz: Türkiyənin qarşısında Zəngəzur dəhlizi də daxil olmaqla yeni imkanlar açılır
Ankara, 17 iyun, AZƏRTAC
Müasir Türkiyə Zəngəzur dəhlizi və “İnkişaf Yolu” layihəsinin inkişafı da daxil olmaqla çoxsaylı imkanlarla qarşılaşır.
AZƏRTAC xəbər verir ki, bu barədə vitse-prezident Cevdet Yılmaz Ankarada Türkiyə Podratçılar Birliyi tərəfindən təşkil edilən “Türkiyə inşaat sammiti”nin iştirakçıları qarşısında çıxış edərkən bildirib.
Regional proseslərdən danışan Yılmaz münaqişələrin qonşu dövlətlərin iqtisadiyyatına və humanitar proseslərinə böyük təsir göstərdiyini qeyd edib.
“Müharibələr heç kimə fayda vermir, onlar ancaq dağıntılara səbəb olur. Biz şəhərlərin bərpasını və insanların rifah halının yaxşılaşmasını görmək istəyirik. Əminəm ki, qarşıdurma dövrünün sonu ilə dövlətlərin yenidən qurulması səyləri sürətlənəcək və Türkiyənin tikinti sektoru üçün yeni perspektivlər açılacaq”, - deyə o bildirib.
C. Yılmaz Türkiyə iqtisadiyyatının inkişafında tikinti sektorunun xüsusi rolunu vurğulayıb: “İnşaat sektoru Türkiyənin ümumi daxili məhsulunun təxminən 6 faizini təşkil edir. İqtisadiyyatın digər sektorlarına onun dolayı təsirini nəzərə alsaq, bu rəqəm daha yüksəkdir”.
O qeyd edib ki, 2002-ci ildən 2025-ci ilə qədər Türkiyə iqtisadiyyatı orta hesabla 5,3 faizlik artım nümayiş etdirib, qlobal iqtisadiyyat isə orta hesabla ildə 3,5 faiz böyüyüb. Bundan əlavə, 2,2 milyon nəfərin çalışdığı Türkiyənin tikinti sektorunun orta illik artımı eyni dövrdə 6,8 faiz təşkil edib.
“Bu günə qədər Türkiyə tikinti şirkətləri 138 ölkədə ümumi dəyəri 563 milyard dollara qədər olan layihələri başa çatdırıb. Beynəlxalq tikinti şirkətlərinin sayına görə biz Çindən sonra dünyada ikinci yerdəyik. Dünyanın ən böyük 250 beynəlxalq tikinti şirkəti siyahısına qırx beş türk şirkəti daxildir ki, bu da əldə etdiyimiz səviyyəni əyani şəkildə göstərir”, - deyə o qeyd edib.
Bölmənin digər xəbərləri
