Ceyhun Hüseynov: Dövlət Proqramı azərbaycanlı gənclərin dünyanın aparıcı universitetlərində təhsilinə geniş imkanlar yaradıb
Bakı, 6 may, AZƏRTAC
Azərbaycanlı gənclərin xaricdə təhsil alması ənənəsinin əsası hələ sovet dövründə qoyulub. Ulu Öndər Heydər Əliyev tərəfindən yaradılan imkanlar sayəsində yüzlərlə azərbaycanlı tələbə Moskva, Sankt-Peterburq və digər qabaqcıl şəhərlərin nüfuzlu ali məktəblərində təhsil alıblar. Bu ənənə Prezident İlham Əliyev tərəfindən uğurla davam etdirilib. 2007-2015-ci illəri əhatə edən Dövlət Proqramı minlərlə azərbaycanlı gəncin dünyanın aparıcı universitetlərində təhsil almasına geniş imkanlar yaradıb.
AZƏRTAC xəbər verir ki, bu fikirləri Gənclər Fondunun icraçı direktorunun müavini Ceyhun Hüseynov Dövlət Proqramının təqdim etdiyi imkanlara həsr olunmuş tədbirdə deyib. O bildirib ki, Xaricdə təhsil üzrə Dövlət Proqramı gənclərin həm şəxsi inkişafına, həm də ölkəyə xidmət etməsinə şərait yaradır: “Xaricdə təhsil alan hər bir azərbaycanlı ölkəsini layiqincə təmsil etməlidir. Siz yalnız özünüzü deyil, ailənizi və dövlətinizi təmsil edirsiniz. Bu, böyük məsuliyyətdir. Hər zaman irəlidə olun, uğur qazanın və Azərbaycanın səsini yüksəklərdə təmsil edin”.
Bölmənin digər xəbərləri
