Çayların sululuğu ilə bağlı aparılmış araşdırmanın nəticələri açıqlanıb

27.09.2014 [11:34]
Çap et
A⁺ A^-

Bakı, 27 sentyabr (AZƏRTAC). Hazırda Böyük Qafqazın Quba-Xaçmaz bölgəsi çaylarında sululuq ongünlük normanın 90-120, Kiçik Qafqazın çaylarında 30-110, Lənkəran-Astara bölgəsi çaylarında 10-20 faizini təşkil edir. Kür çayının Qıraqkəsəmən məntəqəsində suyun səviyyəsində 3, Qanıx çayının Əyriçay məntəqəsində 6 sm azalma müşahidə olunub.

AZƏRTAC xəbər verir ki, bu barədə Ekologiya və Təbii Sərvətlər Nazirliyinin Milli Hidrometeorologiya Departamentinin verdiyi məlumatda bildirilir.

Kür çayının aşağı axınında isə suyun səviyyəsində əsasən artım qeydə alınıb. Belə ki, Kür çayının Şirvan məntəqəsində 25, Salyanda 12, Bankədə 8, Araz çayının Novruzlu məntəqəsində 5 sm artım olub.

Hazırda Surra məntəqəsində suyun səviyyəsi 329, Şirvanda 196, Salyanda 130, Bankədə 191, Novruzlu məntəqəsində isə 68 sm təşkil edir.