ÇEXİYA JURNALİSTİ SLOVAKİYA HÖKUMƏTİNİN İCLAS SALONUNDA XƏLVƏTİ DİİNLƏMƏ TƏŞKİL ETMİŞDİR

18.05.2006 [22:43]
Çap et
A⁺ A^-

AZƏRTAC İTAR-TASS agentliyinə istinadla xəbər verir ki, Çexiya jurnalisti Slovakiya hökumətinin iclas salonunda xəlvəti dinləmə təşkil etmişdir. Bu yaxınlarda respublika hökuməti sarayında keçirilmiş “açıq qapı günü” zamanı o, Nazirlər Kabinetinin iclaslarında Baş nazirin əyləşdiyi stola mobil telefonu gizlicə bərkitmişdir.

Slovakiya radiosu bildirmişdir ki, salona baxış zamanı dövlət rəhbərlərinin təhlükəsizliyini təminetmə idarəsinin əməkdaşları informasiyanı ötürmə rejimində işləyən bu aparatı tapmışlar.

Slovakiyanın xüsusi xidmət idarələri hökumətin iclasını xəlvəti dinləmək istəyən təxribatçını operativ surətdə aşkar etmişlər. “Sarı” nəşrlərdən birinə işləyən 24 yaşlı Çexiya jurnalistini iki ilə qədər həbs cəzası və Slovakiyadan deportasiya olunmaq təhlükəsi gözləyir.

Dərhal yerli mətbuatın diqqətini cəlb edən bu hadisənin səbəbkarı deyir ki, o, Baş nazirin mühafizə xidmətinin yaxşı işləyib-işləmədiyini yoxlamaq istəyirmiş.

Slovakiya Baş nazirinin mətbuat katibi Martin Maruşka müxbirin davranışını “jurnalist etikasına zidd” hərəkət kimi səciyyələndirmişdir.