DÜNYA
ÇİN ƏCNƏBİ ASTRONAVTLARLA TƏLİM KEÇMƏYƏ HAZIRDIR
AZƏRTAC xəbər verir ki, Sinxua agentliyinin yaydığı məlumata görə, Çin əcnəbi astronavtlarla təlim keçməyə hazırdır. Bunu Çin Kosmik Mərkəzinin nümayəndəsi U Çuanşen bildirmişdir.
Onun sözlərinə görə, Çin astronavtların, o cümlədən əcnəbi astronavtların hazırlanması texnologiyasına malikdir, lakin əlavə məşq mərkəzləri tikmək lazımdır. Kosmik Mərkəz əcnəbi astronavtlar hazırlamaq proqramına öz inkişafının əsas məsələlərindən biri kimi baxır. On illər boyu aparılmış tədqiqatlar nəticəsində astronavtların çinsayağı hazırlanmasının nadir kosmik və tibb texnologiyaları yaradılmışdır. Hazırda Çində 14 nəfərdən ibarət astronavt dəstəsi var. Onların hazırlanması 7-8 il vaxt aparmışdır. Mərkəzin nümayəndəsinin dediyinə görə, Çinin tarixində ikinci pilotlu “Şençjou-6” kosmik gəmisinin uğurlu uçuşu onu göstərir ki, Çin dünyada müstəqil şəkildə astronavtlar hazırlayan üçüncü ölkədir.