Çin televiziyası Azərbaycanda Çin Yeni ilinin qeyd edilməsi haqqında reportaj yayımlayıb
Bakı, 19 fevral, AZƏRTAC
Çinin CGTN dövlət xəbər kanalında Azərbaycan Dillər Universitetinin Konfutsi İnstitutunun Çin səfirliyi və ölkəmizdəki Çin diasporu ilə birlikdə təşkil etdiyi bir sıra genişmiqyaslı tədbirləri işıqlandıran Bakıda Çin Yeni ilinin qeyd olunması haqqında reportaj yayımlanıb.
AZƏRTAC xəbər verir ki, bayram tədbirlərində iştirak edən Çinin Azərbaycandakı səfirliyinin müşaviri - səfir Din Tao qeyd edib: “Yaz Bayramı UNESCO-nun Qeyri-maddi İrsi Siyahısına daxil edilib. Bayramımızın Azərbaycanın Novruz bayramı ilə ortaq dəyərləri var; hər ikisi yenilənməni və yazın gəlişini simvolizə edir. Azərbaycanda at, Çində gələn ili simvolizə etdiyi kimi, azadlıq və güc ruhunu da təcəssüm etdirir. Bunda mədəniyyətlərimiz bir-biri ilə həmrəydir. Qoy xalqlarımız iki qüdrətli qaçağan kimi ortaq, gözəl gələcəyə doğru inamla yan-yana irəliləsinlər!”
Televiziya kanalına verdiyi müsahibədə Azərbaycan Dillər Universitetinin Konfutsi İnstitutunun direktoru Rafiq Abbasov bu il Konfutsi İnstitutunun 10 illiyinin qeyd olunduğunu qeyd edib. O, İnstitutun Çin dili və mədəniyyətinin təbliği sahəsindəki fəaliyyətindən, ənənəvi Çin bayramlarının millətlərarası mədəni ünsiyyətin inkişafında əhəmiyyətindən və Konfutsi İnstitutunun mədəni diplomatiyadakı rolundan danışıb. O, həmçinin vurğulayıb ki, imzalanmış "Azərbaycan Respublikası ilə Çin Xalq Respublikası arasında Hərtərəfli Strateji Tərəfdaşlıq Münasibətlərinin Qurulması haqqında Birgə Bəyanat”da Azərbaycanda Konfutsi İnstitutunun inkişafının dəstəklənməsinin və hər iki ölkənin təhsil müəssisələrində Azərbaycan və Çin dillərinin tədrisinin təşviq edilməsinin vacibliyi xüsusi vurğulanır.
Reportajda həmçinin Konfutsi İnstitutunun tələbələrinin canlı konsert proqramı ilə çıxış etdiyi görüntülər də yer almışdır. Bu proqramda ənənəvi Çin mahnıları, ənənəvi Çin alətlərində ifa olunan melodiyalar və Çin mədəniyyətinin özünəməxsus cazibəsini nümayiş etdirən xalq rəqsləri ifa edilmişdir.
Bölmənin digər xəbərləri
