Çində kosmik turizm 2035-ci ilədək kommersiya inkişafının yeni mərhələsinə qədəm qoyacaq
Bakı, 16 aprel, AZƏRTAC
Kosmik sənayenin davamlı sürətli və dayanıqlı inkişafı ilə Çinin bu sahədə turizm sektoru yaxın 5-10 il ərzində kommersiya inkişafının ilkin mərhələsinə qədəm qoyacaq.
AZƏRTAC Sinxua agentliyinə istinadla xəbər verir ki, bu barədə ölkənin kommersiya kosmik sənayesinin inkişafına dair nüfuzlu “CCID Consulting” məşvərətçi şirkətinin aprel hesabatında deyilir.
Sənəddə qeyd olunur ki, bütün istehsal zənciri sürətli inkişafa nail olub.
Hesabatda 2026-2030-cu illərin sonu və ya 2031-2035-ci illər arasında Çinin kommersiya kosmik sənayesinin daha da təkmilləşəcəyi, gəlirini xeyli artıracağı və qlobal miqyasda indikindən çox nüfuz qazanacağı ehtimal edilir.
“CCID Consulting” şirkətinin aparıcı tədqiqatçısı Yanq Şaosyan hesab edir ki, yaxın 5-10 il ərzində Çinin kosmik turizmi sektoru və Ayın kommersiya əsasında tədqiqi siyasətində irəliləyişlərə nail olunacaq, sınaq uçuşları həyata keçiriləcək və ya kommersiya inkişafının ilkin mərhələlərinə qədəm qoyulacaq.
Kosmosun kommersiya məqsədli tədqiqi Çin üçün strateji əhəmiyyət kəsb edir və 2024-cü ildə hökumətin fəaliyyəti ilə bağlı hesabatına ölkənin “iqtisadi inkişafın yeni lokomotivi” kimi daxil edilib.
2024-cü ilə dair hökumətin hesabatında, həmçinin Çinin kommersiya kosmonavtikası, aşağı hündürlü orbit iqtisadiyyatı və digər inkişaf etməkdə olan sənayelərin təhlükəsiz və sağlam inkişafını təşviq edəcəyi bildirilir.
Bölmənin digər xəbərləri
