Çinin aparıcı elektromobil istehsalçıları satışları artırıb
Bakı, 3 mart, AZƏRTAC
Çinin aparıcı elektromobil istehsalçıları 2025-ci ilin fevral ayında elektrik avtomobillərinin satışını artırmağa müvəffəq olublar.
AZƏRTAC xəbər verir ki, “Nio” şirkəti fevralda 13 min 192 elektrik avtomobili satıb və bu, ötən ilin analoji dövrü ilə müqayisədə 62 faiz çoxdur. “XPeng” şirkəti elektromobil satışını 6,7 dəfə artıraraq 30 min 453 ədədə çatdırıb. “Li Auto” isə 30 faizlik artıma nail olaraq bazara 26 min 263 avtomobil tədarük edib.
Çinin hər üç şirkəti ümumilikdə elektrik avtomobili satışlarını 2,1 dəfə artıraraq 70 min ədədə çatdırıb.
BYD fevral ayında bazara 318 mindən çox elektromobil çıxarıb ki, bu da ötən illə müqayisədə 2,6 dəfə çoxdur. “Geely” isə satışı 84 faiz - təxminən 205 min ədədədək artırıb.
2024-cü ilin martında ilk elektrik avtomobili SU7-ni təqdim edən smartfon istehsalçısı “Xiaomi” isə bazara 20 mindən çox elektromobil çıxarıb.
Ötən ay Çin bazarında yeni elektromobillərin payı təxminən 53 faiz təşkil edib, martda isə bu göstəricinin 65 faizə çatacağı proqnozlaşdırılır.
Bölmənin digər xəbərləri
