Çinin ən mühüm mineralların ixracına məhdudiyyət tətbiq etməsi qlobal miqyasda narahatlıq yaradıb
Bakı, 4 iyun, AZƏRTAC
Aprel ayında Çinin geniş çeşiddə kritik mineralların və maqnitlərin ixracını dayandırmaq qərarı bütün dünyada avtomobil istehsalçıları, aerokosmik kompaniyalar, yarımkeçirici istehsalı şirkətləri və müdafiə podratçıları üçün mərkəzi təchizat zəncirlərini pozub.
AZƏRTAC xəbər verir ki, qlobal avtomobil istehsalçıları Çinin ixrac məhdudiyyətlərinin həlli yolunun tezliklə tapılmayacağı təqdirdə istehsalın ləngiməsi və fasilələr baş verə biləcəyi barədə xəbərdarlıq ediblər.
“Reuters” xəbər verir ki, bu addım Çinin kritik mədənçilik sektorunda üstünlüyünü vurğulayır, həmçinin ABŞ Prezidenti Donald Tramp ilə davam edən ticarət müharibəsində təsir vasitəsi kimi qiymətləndirilir.
Tramp böyük ticarət kəsirini azaltmaq və itirilmiş istehsalı canlandırmaq ümidi ilə milyardlarla dollar dəyərində idxal mallarına yüksək tariflər tətbiq etməklə Birləşmiş Ştatların əzəli iqtisadi rəqibi Çinlə ticarət əlaqələrini yenidən müzakirə etməyə çalışıb.
ABŞ Prezidenti Çinə 145 faizlik tariflər tətbiq edib, amma daha sonra birja, istiqraz və valyuta bazarlarının tariflərin miqyasından qəzəblənməsi fonunda onları azaldıb. Çin bu addıma öz tarifləri ilə cavab verib və Trampı geri çəkilməyə inandırmaq üçün əsas təchizat zəncirlərindəki üstünlüyündən istifadə edir.
Ağ evin mətbuat katibi Kerolayn Levitt çərşənbə axşamı jurnalistlərə bildirib ki, Donald Tramp və Çinin Sədri Si Cinpin arasında bu həftə danışıqlar aparılacağı və ixrac qadağasının gündəmdə əsas yer tutacağı gözlənilir.
Çinin bir çox limanlarında avtomobillərdən və dronlardan tutmuş robotlara, raketlərə qədər bütün məhsulları istehsal etmək üçün lazım olan maqnitlərin daşınması dayandırılıb. Bu əsnada lisenziya ərizələri Çinin tənzimləmə sistemindən keçib. Dayandırılma Tokiodan Vaşinqtona qədər korporativ iclas zallarında və paytaxtlarda yeni avtomobillərin və digər məhsulların istehsalının yayın sonuna qədər dayana biləcəyi ilə bağlı narahatlıqları artırıb.
“Reuters” agentliyinin məlumatına görə, Yaponiya işgüzar heyəti məhdudiyyətlərlə bağlı Ticarət Nazirliyi ilə görüşmək üçün iyunun əvvəlində Pekinə səfər edəcək. Eyni zamanda, əsas avtomobil sənayesi olan Avropa ölkələrinin diplomatları da son həftələrdə Çin rəsmiləri ilə “təcili” görüşlər keçirməyə can atıblar.
Bölmənin digər xəbərləri
