CORC BUŞUN FƏRMANI İLƏ POÇT BÖLMƏSİ ROKKİ MARÇİANONUN ADINI DAŞIYACAQDIR
AZƏRTAC xəbər verir ki, ABŞ Prezidenti Corc Buşun imzaladığı fərmana əsasən Brokton şəhərinin (Massaçusets ştatı) poçt bölməsi ağır çəkidə sabiq dünya çempionu - öz karyerasını məğlubiyyətsiz başa çatdırmış yeganə ağırçəkili çempion Rokki Marçianonun adını daşıyacaqdır. Poçt bölməsinin adının dəyişdirilməsi təşəbbüsünü Broktonun meri irəli sürmüşdür. Şəhərin sakinləri öz məşhur həmyerlisini unutmamışlar.
Brokton şəhərində boksçunun tunc abidəsinin qoyulması da planlaşdırılır. Abidənin hazırlanması və quraşdırılması xərcini Dünya Boks Şurası (WBC) çəkəcəkdir.
WBC prezidenti Xose Süleyman bildirmişdir ki, bu ilin oktyabrında Broktona gedəcəkdir. Brokton həm də daha bir məşhur çempionun - Marvin Xaqlerin vətənidir. Rokki Marçianonun abidəsinin qoyulacağı yer boksçunun qohumları ilə razılaşdırılıb müəyyən ediləcəkdir.
Bölmənin digər xəbərləri
