COVID-19: dünyada sutkalıq ölümlərin yarıdan çoxu Hindistan və Braziliyada baş verib
Bakı, 10 iyun, AZƏRTAC
İyunun 9-da dünyada 420 mindən çox yoluxma və 14 min 97 ölüm faktı qeydə alınıb.
AZƏRTAC pandemiyanın statistikasını aparan Worldometer saytına istinadla xəbər verir ki, ötən sutka ərzində qeydə alınan yoluxma hallarının təxminən dörddəbiri (102 min 693 nəfər) və ölüm hallarının isə yarıdan çoxu (8 min 622 nəfər) Hindistan və Braziliyanın payına düşüb.
Dünyanın 28 ölkəsində koronavirusa yoluxanların sayı milyondan çoxdur, 9 ölkədə isə infeksiyadan ölənlərin sayı yüz min nəfəri keçib.
ABŞ COVID-19 infeksiyasına həm yoluxanların, həm də ölənlərin sayına görə dünyada liderlik edir. Burada koronavirusa 34 milyon 264 min nəfər yoluxub, 613 min 494 nəfər həyatını itirib. Yoluxanların sayına görə ikinci yeri tutan Hindistanda 29 milyon 183 min nəfərdə COVID-19 xəstəliyi təsdiqlənib, 359 min 695 nəfər vəfat edib. Yoluxma göstəricisi üzrə üçüncü pillədə Braziliya qərarlaşıb. Burada pandemiya dövrü ərzində 17 milyon 125 min nəfərdə virus aşkarlanıb, onlardan 479 min 791 nəfəri ölüb.
Qeyd edək ki, 2020-ci ilin martında Ümumdünya Səhiyyə Təşkilatı yeni koronavirusun yayılmasını pandemiya elan edib.
Bölmənin digər xəbərləri
