“Daimler Truck” şirkəti Almaniyada 5 min iş yerini ixtisar edəcək
Berlin, 9 iyul, AZƏRTAC
Almaniyanın yük avtomobilləri istehsalçısı “Daimler Truck” şirkəti 2030-cu ilədək ölkədə 5 min iş yerinin ixtisar olunacağını açıqlayıb.
AZƏRTAC yerli mediaya istinadla xəbər verir ki, şirkətin açıqlamasında ixtisarların böyük hissəsinin təbii dövriyyə və qismən pensiyaya çıxma yolu ilə həyata keçiriləcəyi bildirilib. Bundan başqa, məqsədyönlü təzminat proqramlarının da həyata keçirilməsi planlaşdırılır.
İxtisarlar əsasən Ştutqart yaxınlığındakı Laynfelden-Exterdinqen bölgəsində yerləşən müəssisədə aparılacaq. Ötən ilin sonunda bu bölgədə təxminən 28 min iş yeri olub. Ümumilikdə isə “Daimler Truck”ın Almaniyadakı müəssisələrində 35,5 min nəfər işləyir.
“Daimler Truck”ın Avropa üzrə qənaət proqramı çərçivəsində xüsusilə son dövrlər zəifləyən “Mercedes-Benz Trucks” markasında istehsal, idarəetmə, satış, inzibati bölmələr və inkişaf sahələrində ixtisarlar həyata keçiriləcək. Təkcə əmək xərcləri deyil, eyni zamanda, materiallar, idarəetmə, IT infrastrukturu, tədqiqat və inkişaf xərcləri də azaldılacaq.
Şirkətin Almaniyada ümumilikdə beş əsas zavodu fəaliyyət göstərir. Proqrama əsasən, təkrarlanan xərclərin 2030-cu ilədək 1 milyard avrodan çox azaldılması hədəflənir.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
