Daş karxanalarının istismarı üçün qanunvericilikdə nəzərdə tutulmuş qaydalara əsasən sənədləşmə işləri davam edir
Bakı, 27 sentyabr, AZƏRTAC
Abşeron yarımadasında fəaliyyət göstərən daş karxanalarında Ekologiya və Təbii Sərvətlər Nazirliyinin (ETSN) əməkdaşları iyul-avqust aylarında monitorinq keçiriblər.
Nazirliyin mətbuat xidmətindən AZƏRTAC-a bildiriblər ki, əksər daş karxanalarının fəaliyyətində nöqsanlar aşkar olunaraq qanunauyğun aktlar tərtib edilib.
Nazirlik tərəfindən görülən tədbirlər karxana sahibləri və istismarçılarda bəzi suallar doğurduğu üçün ETSN-də onlarla görüş keçirilib. Əksər karxana istismarçılarının torpaq ayırmaya dair sərəncamlarının olmadığı, nazirlik tərəfindən verilən ekoloji və geoloji sənədlərin vaxtının bitdiyi, bəzi karxana istismarçılarının isə ümumiyyətlə heç bir sənədinin olmadığı bir daha onların diqqətinə çatdırılıb. Yol verdikləri nöqsanları başa düşdükləri, qoyulan qanuni tələbləri anlayışla qarşıladıqları nəzərə alınaraq karxana istismarçılarına mövcud olan nöqsanların aradan qaldırılması, sənədlərinin tam qaydaya salınması üçün əlavə 45 gün vaxt verilib.
ETSN müvafiq icra orqanlarından sərəncam alan hər bir fiziki və hüquqi şəxsə ekoloji sənədlər verəcək. Torpaq ayırmaya dair sərəncamı olan istismarçılar “Bərəkət 98”, “Gülbaxt TMK” və digərləri ekoloji və geoloji sənədlərin alınması üçün Ekspertiza İdarəsinə müraciət edib. Yaxın günlərdə sənədlər onlara təqdim olunacaq. Hər bir istismarçıya işlərinin aparılması zamanı ətraf mühitə mənfi təsirin azaldılması məqsədilə müasir texnologiyalardan istifadə edilməsi barədə tövsiyələr, karxanaların müasir metodlar ilə istismara keçməsi üçün isə müəyyən vaxt veriləcək.
Bölmənin digər xəbərləri
