Davidi Karataşvili: Göstərdiyim nəticədən çox razıyam
Bakı, 7 may, AZƏRTAC
Bakı marafonunda ilk dəfə iştirak edirəm. Çox xoşbəxtəm, bu fürsətə görə təşkilatçılara təşəkkür edirəm. Bu marafona üç ay hazırlaşmışam. Nəticəmdən razıyam.
Bu barədə AZƏRTAC-a “Bakı Marafonu-2023”də 1 saat 5 dəqiqə 35 saniyəlik nəticə ilə ikinci yeri tutan gürcü Davidi Karataşvili deyib.
“Mən Rio-de-Janeyro və Tokioda keçirilən olimpiadalarda iştirak etmişəm. 5 kilometrlik yarımarafonda və 10 km marafonda Gürcüstan rekordu mənə məxsusdur. Hava yaxşıdır. Gələn il də Bakı yarımarafonunda iştirak etməyi planlaşdırıram”, - deyə D. Karataşvili bildirib.
2016-cı ildən keçirilən Bakı Marafonu idmanın inkişafına dəstək və sağlam həyat tərzinin təbliği məqsədi daşıyır. Kişilər arasında “Küləyə qalib gəl” şüarı altında keçirilən indiki yarışın qalibi ukraynalı Boqdan Simonoviç oldu. İkinci yeri gürcüstanlı David Karataşvili, üçüncü yeri isə türkiyəli Çoban Arkan tutub. Qadınlar arasında ukraynalı Natalya Simonoviç qalib gəlib. Türkiyəli Hasibe Dəmir finiş xəttinə ikinci gəlib, digər ukraynalı Valentina Poltavska üçüncü yeri tutub. 21 kilometrlik məsafəni əhatə edən yarımarafonun start və finişi Dövlət Bayrağı Meydanında yerləşib.
Bölmənin digər xəbərləri
