Dəmiryol Səyyar Klinikası Astarada oftalmoloji aksiya keçirəcək
Bakı, 6 may, AZƏRTAC
Mayın 7-8-də Dəmiryol Səyyar Klinikası Astara rayonunda Səhiyyə Nazirliyi, “Azərbaycan Dövlət Yolları” Qapalı Səhmdar Cəmiyyəti və akademik Zərifə Əliyeva adına Milli Oftalmologiya Mərkəzinin birgə təşəbbüsü ilə tibbi aksiya keçirəcək.
Milli Oftalmologiya Mərkəzindən AZƏRTAC-a verilən məlumata görə, akademik Zərifə Əliyevanın anadan olmasının 102 illiyinə həsr edilmiş aksiya çərçivəsində yerli əhali göz sağlamlığı ilə bağlı müayinədən keçəcək və müalicə yolları müəyyən ediləcək. Həkimlər əldə olunan nəticələri dəyərləndirərək lazımi tövsiyələr verəcəklər. Eyni zamanda, ciddi oftalmoloji problemlərlə üzləşən və əməliyyata ehtiyacı olan pasiyentlərə daha geniş tibbi yardım göstərilməsi üçün Milli Oftalmologiya Mərkəzinə müraciət etmələri üçün şərait yaradılacaq.
Müayinədən keçmək istəyənlər yaxın günlərdə Dəmiryol Səyyar Klinikasına müraciət edə bilərlər.
Bölmənin digər xəbərləri
